«Densaýlyq» medıtsınalyq poıyzynyń dárigerleri bir aı shamasynda 15 myńnan astam adamdy qabyldady
ASTANA. Tamyzdyń 2-si. QazAqparat - «Densaýlyq» medıtsınalyq poıyzy jolǵa shyqqan 25 kúnniń ishinde 4568 adam dárigerlerdiń kómegine júgindi, al jalpy qaralǵan azamattardyń sany 18883-ti quraıdy,
dep habarlady «Qazaqstan temir joly» kompanııasynyń baspasóz qyzmetinen.
Aǵymdaǵy jyly shildeniń 1-i men 26-sy aralyǵynda medıtsınalyq poıyz Qaraǵandy oblysynyń 25 stansysynda boldy.
Shildeniń 26-synan poıyz bekitilgen kestege sáıkes Semeı temirjoly bólimshesiniń aýmaǵyndaǵy óz jumysyna kiristi. Bul aımaqta ol 16 stansyda bolady. Osydan keıin Pavlodar oblysynyń aýmaǵyn aralap, onda da 17 stansyǵa aıaldaıdy.
Poıyz dárigerleri 5,5 myńnan astam medıtsınalyq jáne zerthanalyq zertteýler júrgizip, al hırýrgtar 173 kishi operatsııa jasady. Sondaı-aq 1421 adam tis dárigeriniń qyzmetine júgindi.
Esterińizge sala keteıik, shildeniń 1-inde elordadan jóneltilgen medıtsınalyq poıyz Qaraǵandy, Pavlodar, Zaşıta, Óskemen, Aqmola, Qostanaı, Pavlodar oblystarynyń 57 stansysynyń árqaısysyna eki kúnnen toqtap, Astanaǵa 120 kúnniń ishinde oralmaq. Oblystar men iri ortalyqtarda medıtsınalyq qyzmetkerler aýysyp otyrady. Poıyz zamanaýı zerthanalyq quraldarmen, zertteý apparattarymen jaraqtandyrylǵan. Olardyń ishinde qan men zárdi bıohımııalyq saraptaý, rentgen jáne flıýrografııa, ishki aǵzalardy ýltradybyspen zertteý, sondaı-aq júrek, asqazan jáne basqa da organdardy tekserý quraldary bar. Sondaı-aq vagondarda apparattardyń temperatýrasyn bir qalypta ustap turý úshin arnaıy aýa baptaǵyshtar men sýdy zararsyzdandyrý quraldary ornalastyrylǵan.
Poıyz tirkemesinde barlyǵy 9 vagon, olardyń 4-ýinde - emdeý jáne dıagnostıka jasalady, 2-ýi - medıtsınalyq qyzmetkerlerdiń jatyn orny, 1-ýinde dári-dármekter saqtalatyn bolsa, qalǵan ekeý - ashana jáne energııamen derbes qamtamasyz etetin vagondar.
