«Densaýlyq» medıtsınalyq poıyzy «Qazaqstannyń jyl tańdaýy - №1» Ulttyq syılyǵy atalymy boıynsha jeńimpaz atandy
ASTANA. 10 jeltoqsan. QazAqparat - «Qazaqstan temir joly» UK» AQ men QR Tótenshe jaǵdaılar mınıstrligi birlesip jasaqtaǵan «Densaýlyq» emdeý-saýyqtyrýǵa arnalǵan medıtsınalyq poıyzy Qazaqstan Respýblıkasy jurtshylyǵy arasynda júrgizilgen áleýmettik suraý salý nátıjesinde óz atalymy boıynsha úzdik dep tanyldy.
Jergilikti turǵyndardyń pikirimen sanasa kelip jáne ózderiniń de saraptaý qorytyndysyn jarııalaǵan ádilqazylar músheleri bir toqtamǵa keldi, dep habarlady QR Kólik jáne kommýnıkatsııa mınıstrliginiń baspasóz qyzmeti.
«Qazaqstannyń jyl tańdaýy - №1» Ulttyq syılyǵymen marapattaý dástúrli sharasy Almatyda ótkizildi. Jeńimpazǵa qurmetti medalimen statýetka «QTJ» UK» AQ Personaldy basqarý jáne áleýmettik máseleler jónindegi vıtse-prezıdenti Ashat Akchýrınge tabys etildi.
Bıylǵy jyldyń jazy men kúzinde «Densaýlyq» poıyzy eki márte respýblıkanyń shalǵaı stantsııalary men jol aıyryǵynda turatyn, emdeý saýyqtyrý sharalarynan tys qalǵan temirjolshylarǵa medıtsınalyq kómek kórsetý maqsatynda uzaq merzimdi saparda bolyp qaıtty.
Bastapqy baǵdarda Qaraǵandy, Zaşıta, Semeı, Pavlodar jol bólimsheleriniń 34 stansysyn qamtydy. Sapar barysynda 13979 adam dárigerge qaralsa, 284 turǵynǵa otashylyq qyzmeti kórsetildi. Ekinshi baǵdarynda Aqmola, Qostanaı jol bólimsheleriniń 23 stansyn qamtyp, 9304 adamdy qarady. 157 adamǵa otashylyq qyzmet kórsetti. «Densaýlyq» poıyzy eki márte saparynda respýblıka ortalyqtarynan shalǵaı ornalasqan 57 stansynyń turǵyndaryna sapaly medıtsınalyq qyzmet kórsetti.
Almaty vagon jóndeý zaýytynda qaıta jabdyqtalǵan poıyz vagondary oblystyq deńgeıdegi emhanalarmen sáıkes keletindeı dárejedegi medıtsınalyq quraldarmen qamtylǵan bolatyn.
Taıaý arada «Járdem» emdeý-saýyqtyrý poezy Ońtústik jáne Batys óńirge qaraı saparǵa shyǵýǵa daıyndalýda.
Qazirgi kezde «Densaýlyq» poezy tehnıkalyq saraptaýdan ótkizilip, qysqy maýsymǵa sáıkes jabdyqtalýda.
