DENSAÝLYQ: Kúnine qansha jol júrý kerek?
ASTANA. QazAqparat - Jaıaý júrgen densaýlyqqa asa paıdaly, dep jazady Massaget portalynyń densaýlyq aıdarynda.
Ásirese júrek bulshyqetteriniń qalypty jumys jasaýyna jaǵdaı jasaıdy.
Adam kúnine kem degende 3 shaqyrym jaıaý júrýi kerek. Kúndelikti kúıbeń tirshilikpen qansha shaqyrym jol júrip, qansha qımyl-qozǵalys jasaǵanymyzdy qaperge ala bermeımiz. Dese de tehnologııa damyǵan zamanda qımyl-qozǵalysymyz azaıyp bara jatqanyn moıyndaýǵa tıispiz. Keńsede qyzmet isteıtinder 3 shaqyrym jol júrmek túgili, bir-birimen kóp sóılese de bermeıdi. Munyń densaýlyqqa tıgizer zııany kóp. Endeshe aýrýdyń aldyn alýǵa kirisken durys.
Eger kóligińiz bolsa, aptasyna birneshe kún jumysqa qoǵamdyq kólikpen ne jaıaý baryńyz. Jaıaý júrý salmaǵyńyzdy birqalypty ustaýǵa da kómektesedi. Ol úshin jumysyńyzǵa barar jolda jáne qaıtar jolda bir aıaldama buryn túsip qalyp, jaıaý júrińiz.
Kópqabatty úıde tursańyz, lıft kómegine kóp júginbegen jón. Sebebi, baspaldaqpen túsip-kóterilýdiń ózi - jattyǵý. Jumysta da oryndyqta uzaq otyra bermeı, jıi qımyldańyz.
Tym quryǵanda kúnine 15-20 mınýtyńyzdy serýendeýge arnańyz. Sebebi, jaıaý júrý - este saqtaý qabiletińizdi jaqsartyp, qanaınalymyńyzdy retteıdi. Kúnine 1 shaqyrym jaıaý júrý - 10 mınýt júzýge, 16 mınýt aerobıkamen aınalysýǵa, 12 mınýt fýtbol oınaýǵa jumsaǵan qýatpen teń.
Sporttyń keıbir túri adam densaýlyǵyna keri áserin tıgizýi múmkin. Alaıda, jaıaý júrýdiń eshqandaı da zııany joq. Qımyl-qozǵalys qashan da mańyzdy.
