DENSAÝLYQ: Kózdiń kórý qabiletin jaqsartý

Jumys ornyn durys uıymdastyryńyz

Eń birinshi jáne óte mańyzdy keńes. Kompıýterge durys otyrýdy oılaıtyn adam az. Esh zańdylyqty saqtamaı otyra salyp, keıin arqa nemese moıyn aýyrǵanda basqa jaqqa burylyp, osylaısha, ekranǵa odan ári jaqyndaı túskenimizdi baıqamaı qalatynymyz bar.

1. Monıtor: monıtor ádettegiden sál alshaq ornalasýy qajet. Monıtordyń joǵarǵy sheti kózben bir deńgeıde nemese sál tómenirek ornalasýy qajet.

2. Jaryq berý: ekran neǵurlym jaryq bolsa, bólme de soǵurlym sáýleli bolýy qajet. Kóz asa qatty jaryqqa qaraýǵa qabiletsiz. Sondyqtan, jaryq ekran men qarańǵy bólmeniń shaǵylysýy kóz bulshyq etterin sharshatady. Sol sebepti, monıtordan túsetin jaryq pen bólmedegi jaryqtyń bir-birine úılesýin qadaǵalańyz.

3. Ózge daq-núktelerdiń bolmaýy: sizdiń monıtoryńyzda kez kelgen jaryq kózi bolmaýy tıis.

4. Taza ekran: ekrandaǵy sulbanyń sapasy meıilinshe joǵary bolsa, kózdiń sharshaýy da tómen bolady. Qazirgi kezde monıtorlardyń sapasy óte jaqsy. Alaıda, barlyǵy da shańdy tez jınaıdy da, qanyqtyǵyn joǵaltady. Sondyqtan, ár kún saıyn ekrandy salfetkamen súrtip turyńyz. Ekrandy búldirip alamyn dep qoryqpańyz, óıtkeni, densaýlyq mańyzdyraq!

5. Deneniń durys ornalasýy: oryndyq nemese kresloǵa tik otyryńyz. Otyrysyńyz ózińizge yńǵaıly bolýy kerek. Áıtpese, siz ekranǵa qaraı eńkeıe beresiz, al bul kózge túsetin aýyrtpalyqty odan ári kóbeıtedi. Eger siz kompıýtermen jumys kezinde qandaı da bir qaǵaz qujattardy qaraıtyn bolsańyz, onda qujattaryńyzdy janyńyzdaǵy qandaı da bir tireýishke qoıyńyz. Bul jaǵdaıda siz qaıta-qaıta aqparat alý úshin qaǵazǵa úńilip, kózdiń qyzmetin aýyrlata túspeısiz. Moınyńyz da aýyryp qalmaıdy.

Árbir 45 mınýt saıyn úzilis

Bul jaqsy keńes. Alaıda, kompıýterge otyrǵan soń, ýaqytty tekserip jatatyn kim bar?! Statıstıkaǵa sensek, kompıýterge otyratyn adamdardyń 90 paıyzy jumys ýaqytynyń qashan bitetinin anyqtaý úshin nemese uıyqtaıtyn ýaqyt bolǵan-bolmaǵanyn bilý úshin ǵana saǵatqa qaraıdy eken. Kompıýterge bir otyrǵan soń, ýaqytty baǵamdap otyrý qıyn. Sol sebepti, 45 mınýt saıyn úzilis jasaýdy qolǵa alyńyz.

Kózge arnalǵan jattyǵý

Eger tek bir baǵytqa qarap jumys isteseńiz, kózdiń bulshyq etteri sharshaıdy. Sol sebepti, kózińizdi jumys, jaryqty ótkizbeý úshin alaqanyńyzben jabyńyz. Kózdi bosańsytyp, qımyldatpańyz. Osy aralyqta, juldyzdy aspandy nemese qandaı da sýret kartınasyn kóz aldyńyzǵa elestetip, jaqsy emotsııaǵa bólenińiz. Tipti, sheksiz qarańǵylyqqa qaraý arqyly da, bul jattyǵýdy jasaýǵa bolady. 2-3 mınýt ótken soń, kózińizdi ashyńyz. Sóz joq, janaryńyzdyń demalyp qalǵanyn sezinesiz.

Tereze aldyna kelińiz de, kózdi fokýstandyrýǵa arnalǵan jattyǵýǵa kóńil bólińiz. Terezeniń áınegine dıametri 3-5 mm bolatyn belgini japsyryp qoıyńyz da, osy belgilen 30 santımetrdeı alshaq turyńyz. Kózińizdi sol belgige salyp, keıin dereý tereze syrtyndaǵy bir zattarǵa burylyńyz (baǵana, jarnama, aǵash t.b). Árbir fokýstandyrý kezinde 2-3 sekýndqa aıaldańyz. Eger kózińizge qatty kúsh tasyp jatsa, fokýstandyrýdy azyraq oryndaýǵa bolady. Biraq, bir jattyǵý kezinde 30 ret osy ádisti qaıtalasańyz, nur ústine nur bolary sózsiz. Osydan soń, birneshe mınýt boıy kez kelgen basqa zattarǵa nazar aýdaryńyz. Bul kezde basyńyzdy qozǵamaı, tek kózben ǵana qaraǵan jón.

Bul jattyǵý tek kózge ǵana emes, únemi oryndyqqa otyrýdyń saldarynan kóp qozǵalysqa túspeıtin besinshi núkteniń de qımyldaýyna ákeledi.

Kózge arnalǵan tamshylar

Kózinde qurǵaqtyq, «qum» jáne «qıqym» baıqalatyn adamdarǵa arnalǵan keńes. Monıtorǵa kóp qaraýdyń saldarynan, kózdegi jas suıyqtyq qurǵap ketkende tamshylarǵa bet burǵan durys.

Eger kózińizde qurǵaqtyq baıqalsa, aldymen kózdi kóp jypylyqtatyńyz. Eger bul kómektespese, dárihanadan kózge arnalǵan tamshylar satyp alyńyz da, kózge tamyzyńyz. Eger tamshyny paıdalanǵan soń, asqyný nemese basqa da belgiler paıda bolsa, oftalmologtan keńes alyńyz.