Densaýlyq qory ne úshin qurylady
ASTANA. QazAqparat - «Halyq densaýlyǵy jáne densaýlyq saqtaý júıesi týraly» jańa kodekstiń jobasynda Densaýlyq qoryn qurý máselesi qarastyrylǵan. Búgin «Atameken» ulttyq kásipkerler palatasy atalǵan máseleni qoǵamdyq talqylaýǵa shyǵardy, dep habarlaıdy QazAqparat tilshisi.
Josparǵa sáıkes, qordyń qarjysyna densaýlyq saqtaý jáne salaýatty ómir saltyn qalyptastyrý sharalary uıymdastyrylady. Budan bólek, úkimettik emes uıymdardyń ony qosymsha qarjy kózi retinde paıdalana alady. Al qordyń qarajatyn alkogol jáne temeki ónimderin shyǵaratyn kompanııalar aýdaryp otyrady. QR Densaýlyq saqtaý mınıstrligi aktsız stavkasynyń 2 protsentin qordyń jarnasy retinde bekitýdi usynyp otyr. Osynyń arqasynda Densaýlyq qoryna jyl saıyn shamamen 5-6 mlrd teńge túsedi degen boljam bar.
«Búginde mınıstrlikte Densaýlyq qorynyń strategııasyna qatysty naqty ustanym joq. Qor qandaı erejeler boıynsha jumys isteıdi? Onyń quramyna kimder kiredi? Qorǵa túsken qarjy qalaı taratylady? Ony kim jáne qalaı baqylaıdy? Osy ispetti suraqtar kóp. Búginde osy saladaǵy kompanııalardyń salyqtyq júktemesi de az emes. Aktsızdiń ózi ónim baǵasynyń 50-60 protsentin alyp otyr. Osyǵan baılanysty QR Densaýlyq saqtaý mınıstrligine qordy bıýdjettiń esebinen qarjylandyrý jaǵyn oılastyrý qajet. Sonda bızneske qosymsha salyqtyq júkteme túspeıdi», - delingen resmı habarlamada.
Aıta keteıik, búgingi tyńdaýda temeki ónimderin satýǵa qatysty shekteýler de talqyǵa salyndy. Atap aıtqanda, kodekste bilim mekemelerinen 100 metr qashyqtyqta temeki ónimderin satýǵa tyıym salynǵan. Budan bólek, temeki ónimderin sórege qoıýǵa bolmaıdy. Al shaǵyn saýda oryndary (aýdany 10 sharshy metrge deıingi) temekini múldem sata almaıdy.
