DENSAÝLYQ: Qandaı jaǵdaıda adam kartop pen kúrishten ýlanyp qalýy múmkin?
ASTANA. QazAqparat - Keı kúnderi tamaqty mólsherden tys kóp daıyndap, asyp qalǵany kelesi kúnge qalyp qoıatyn kezder bolady. Eger keıbir taǵam túrlerin tońazytqyshqa salmaı, kelesi kúni jylytyp jesek, odan ýlanyp qalýymyz múmkin, dep jazady massaget.kz.
Kartop - joǵary kómirsýtekti ónim. Eger ony daıyndaǵan soń bólme temperatýrasynda birneshe saǵatqa qaldyrsa, túrli mıkroaǵzalardyń qorektený ortasyna aınalady. Kartopty daıyndaý kezinde mıkroaǵzalardy óltirgenimen, ony ekinshi ret dál sondaı temperatýrada qyzdyrsańyz da, ondaı nátıjege jete almaısyz. Bólme temperatýrasynda qaınaǵan ne qýyrylǵan kartopta bakterııalar kóbeıe bastaıdy.
"Kún saıyn derlik solaı isteımiz, biraq ýlanyp jatqan joqpyz" deýińiz ábden múmkin. Bizdiń aǵzamyz bakterııanyń belgili bir kólemimen kúresýge beıimdelgen. Kishkentaı balalardyń ımmýnıteti álsiz, sondyqtan tońazytqyshqa salynbaı, jylytyp ishken as balalarǵa qaýipti.
Kúrish te kómirsýtekke (kúrdeli qanttar) baı. Ol da jyly jerde qanshalyqty uzaq tursa, sonshalyqty bakterııa kóp jınalady. Palaýǵa maı, tuzdyq, dámdeýishter qosatyn bolǵandyqtan, olar palaýdy qorshaǵan ortadan qorǵap, bakterııanyń taralýyn azaıtady. Sondyqtan mundaı ózgeriske beıimi - sýǵa qaınaǵan kúrish.
Alaıda kez kelgen taǵam qaldyǵyn tońazytqyshqa jyldamyraq salsańyz, ýlaný yqtımaldyǵy da azaıady.
Tamaqty tońazytqyshqa salmas buryn qanshalyqty sýytý kerek?
Taǵamnyń temperatýrasy 80 gradýstan túse bastaǵanda, bakterııa taraı bastaıdy. Sondyqtan, tamaq tolyqtaı bólme temperatýrasyna deıin sýýyn kútpeı-aq qoıyńyz.
Ystyq tamaqtan tońazytqysh buzylmaı ma?
Eger tómendegi 3 erejeni saqtasańyz, ystyq tamaqtan tońazytqysh buzylmaıdy:
- Tońazytqyshqa tamaqty daıyndaǵan ystyq ydyspen salmańyz. Taǵamdy kez kelgen basqa sýyq ydysqa aýystyryp salyńyz;
- Taǵam salǵan ydystyń qaqpaǵyn myqty bekitip jabyńyz. Tońazytqyshqa taǵamnyń býy jáne ıisi sińbeý qajet.
- Taǵamdy tońazytqyshtaǵy basqa taǵamdarǵa tyǵyzdap, jaqyndatyp qoımańyz.
