«Densaýlyq festıvali - 2013» aktsııasy aıasynda júgirýge 4 myńǵa jýyq astanalyq qatysty
ASTANA. 9 qyrkúıek. QazAqparat - Astananyń «Jeruıyq» saıabaǵynda «Densaýlyǵym keremet - jattyǵýǵa kóp rahmet» uranymen «Densaýlyq festıvali - 2013» dástúrli keń aýqymdy aktsııasy bolyp ótti.
Bul týraly astana.kz saıtyna Salaýatty ómir saltyn qalyptastyrý ortalyǵynyń baspasóz qyzmetinen habarlady.
Іs-shara M.Jumabaev jáne Q.Muńaıtpasov kósheleriniń qıylysynda ınternatsıonalıst-jaýyngerlerge arnalǵan eskertkishtiń janynan aktsııa ótkiziletin jerge («Jeruıyq» parki) deıingi júgirýden bastaldy. Oǵan 4 myńǵa jýyq adam qatysty. Іs-shara aıasynda park aýmaǵynda qalalyq emhanalar «Densaýlyq qalashyǵyn» uıymdastyryp, qant dıabetine ekspress-testter ótkizip, adamdardyń qan qysymyn ólshep, keńester berdi.
Medıtsına qyzmetkerleriniń arasynda sport jarystary, salaýatty ómir saltyn saqtaý erejelerine qatysty shaǵyn trenıngter ótkizildi.
Budan basqa, qala turǵyndary men qonaqtary kúres, taekvando, karate, ulttyq kúres jáne t.b. sport ujymdarynyń kórnekti ónerlerin tamashalady. Marat Omarov, Baqyt Shadaeva, Erkesh Hasen jáne basqa da ártisterdiń qatysýymen kontsert ótti. Al «World class» klýbynyń jattyqtyrýshylary yrǵaqty áýenniń súıemeldeýimen adamdarǵa 20 mınýt boıy jattyǵý jasatty. Munymen qosa, 200 adamnyń qatysýymen fleshmob uıymdastyryldy. Іs-shara sońynda jappaı júgirýdiń jeńimpazdary dıplomdarmen marapattaldy.
