DENSAÝLYQ: Dıeta kezinde qajetti dárýmender
ASTANA. QazAqparat - Artyq salmaqtan arylý úshin adamdardyń kópshiligi tómen kalorııaly dıetalar kómegine júginedi. Al keı adamdar sondaı dıetalarǵa asa áýestenip, densaýlyǵyna zııan keltiredi.
Tamaqtyń úlesin azaıtý, tátti men maılydan bas tartý eshkimge zııan keltirgen emes. Alaıda jyldam nátıjege jetý úshin qajetti azyq-túlikterden de (mysaly, aqýyzdar) bas tartyp jatatyndar bar. Aǵzada zat almasýdy rettep, terini qalpyna keltirip jáne jasýshalardy jańartyp turýy úshin qunarly tamaqtaný qajet. Ásirese, túrli dárýmender ómirlik mańyzy bar protsesterdiń oryndalýyn qamtamasyz etedi. Endeshe, dıeta ustaǵanda aǵzaǵa qandaı dárýmender qajet?
Bul týraly Massaget.kz jazady.
Qorekti zattardyń tapshylyǵyn naqty belgilerden anyqtaýǵa bolady. A dárýmeni jetispese, bulshyqetter álsireıdi, teri sola bastaıdy. Sonymen qatar, A dárýmeni kózdiń jaqsy kórýine de qajet. Aǵzada E dárýmeni az bolsa, maılar jyldam qyshqyldanyp, zat almasý buzylady. V dárýmeni, ásirese áıel adamdar aǵzasyna óte qajet. S dárýmeni dıeta ustamaıtyn adamdardyń ózinde az bolady. Bul dárýmen jetispese, teri qurǵaıdy, kúızeliske ushyratady, tis qanap, shash túsedi.
Keı dárýmenderdi aǵza qajetti mólsherde sıntez jasaıdy. D dárýmeni kúnniń áserinen teri astynda jınalady. Ol úshin kúnniń astyna kúnine birneshe mınýt turǵannyń ózi jetkilikti. Deni saý ishek florasy zat almasýǵa belsendi qatysatyn H dárýmenin jáne súıek tini men tamyrlaryn qalpynda ustaıtyn K dárýmenin óńdeıdi.
Al A, E, S jáne V tobynyń dárýmenderi ózdiginen sıntez jasaı almaıdy. Sondyqtan bul dárýmender qataryn tamaqtan alý qajet. Tolyq emes tamaqtanýda nemese dıeta kezinde bul dárýmenderdi alý múmkin emes bolyp qalady. Eger, densaýlyǵyńyzdy saqtaǵyńyz kelse, dıeta kezinde osy dárýmender bar taǵamdy tamaqtaný úlesińizden shyǵarmańyz nemese dárigerdiń keńesimen dárýmendik prepattardy qoldanyńyz.
