Densaýlyq boıynsha suraqtar jaýapsyz qalmaıdy - OQO
ShYMKENT. QazAqparat - Ońtústik Qazaqstan oblysyndaǵy densaýlyq saqtaý salasy boıynsha qosylǵan «Call ortalyǵyna» 6 myńnan astam qońyraý kelip tústi, dep habarlaıdy QazAqparat tilshisi.
Álemdik talaptarǵa jaýap beretin júıe búginde turǵyndarǵa da, mamandarǵa da tıimdiligin kórsetken.
Oblystyq densaýlyq saqtaý basqarmasy basshysy orynbasarynyń mindetin atqarýshy Aıgúl Imanalınanyń aıtýynsha, 2015 jyly klınıkalyq aýrýhana bazasynda iske qosylǵan biregeı ortalyq endi tıisti basqarmaǵa kóshirildi.
Áleýmettik mańyzy bar joba turǵyndardyń medıtsınalyq kómek boıynsha suraqtaryn, ótinimderin qabyldap, tirkep, qajetti mekemelerge úlestirý maqsatynda qolǵa alynǵan.
Jedel jeli bir mezette 3 telefon qońyraýyn qabyldaı alady. Ári barlyq áńgimeler jazylyp, saraptamadan ótedi. Qoıylǵan suraqtar jaýapsyz qalmaı, saýaldarǵa medıtsınalyq bilimi bar dáriger-sarapshy, ákimger, psıholog jáne operatorlar túbegeıli jaýap beredi.
«Shaǵymdanýshy óziniń JSN nómirin aıtady. Sol arqyly operator azamat týraly barlyq anyqtamany júıeden bile qoıady. Sóıtip, tirkelgen jeri boıynsha dárigerlerge habarlasady. Ortalyq óńirdegi barlyq medıtsınalyq uıymdarmen tyǵyz baılanys ornatqan»,- deıdi Aıgúl Imanalına.
Sala mamanynyń sózinshe, «Call- ortalyq» arqyly ótinim berý qoǵamdy qaǵazbastylyqtan aryltyp otyr. Ázirge ortalyqqa eń kóp qońyraý Túrkistan qalasy men Saryaǵash, Maqtaral aýdandarynan kelip túsedi. Onyń sebebin dárigerler halyq sanynyń kóp bolýymen túsindiredi.
