DENSAÝLYQ: Aryqtaýǵa arnalǵan keptirilgen jemister: dámdi ári paıdaly
ASTANA. QazAqparat - Eger siz táttige qumar bolsańyz, onyń ornyn basatyn keptirilgen jemister baryn umytpańyz. Dıeta ustaǵan adamnyń as mázirine keptirilgen jemister aýadaı qajet. Óıtkeni, keptirilgen jemisterde tabıǵı mıkroelementter men dárýmender mol. Al keptirilgen jemisterdi aryqtaý úshin qoldanýǵa bolatynyn bilesiz be? Keptirilgen jemisterdiń quramynda qant bar ári kalorııaly. Biraq, kúnine az-kem keptirilgen jemis jeý arqyly sizdiń qarnyńyz ashpaıdy.
Keptirilgen jemisterdiń qandaı ereksheligi bar?
Eń aldymen, atalǵan jemisterde boıaǵysh zattardyń bolmaıtynyn aıtý kerek. Adam densaýlyǵyna zııandy hımııalyq qospalar men ózge de zattardy (tek aryqtaýǵa ǵana arnalmaǵan) keptirilgen jemistiń quramynan kórmeısiz. Sondaı-aq, saharozanyń da kólemi kóp emes, kerisinshe glıýkoza men frýktoza mol. Taǵy bir qyzyǵy, jemis kepken saıyn onyń quramynda glıýkoza men frýktoza kóbeıe beredi. Sonymen qatar, kepken jemiste dárýmender men mıkroelementterdiń tutastaı saqtalatynyn umytpaǵan jón.
Dıetologtardyń myna bir keńesine de qulaq túrmeýge bolmaıdy. Keptirilgen jemisti asyqpaı shaınap, keıin bir stakan sý ishseńiz, kópke deıin qarnyńyz ashpaıdy. Endi keptirilgen jemisterdiń negizgi túrlerine toqtalyp ótelik.
Qara órik
Qara órik as qorytýǵa kómektesip, durys aryqtaýǵa septigin tıgizedi. Qara óriktiń artyqshylyǵy - ishek joldarynyń jumysyn jaqsartatyn as talshyqtaryna baı. Bul adam aǵzasynyń shlaktar men zárden tez tazarýyna ákeledi.
Odan bólek, qara órikti jıi paıdalaný depressııaǵa qarsy turýǵa kómektesedi. Máselen, siz dıeta ustap júrsiz. Sondyqtan, stresste de bolýyńyz múmkin. Bul stress odan ári depressııaǵa ulaspaý úshin qara órikti jep turyńyz.
Keptirilgen órik
Keptirilgen órik qyryqqa tolǵan áıel adamnyń as mázirinen túspeýi kerek. Sebebi, ol súıekti osteoporozdan qorǵaıdy. Sondaı-aq, júregi aýyratyn, nesep aıdaǵysh dári qabyldaıtyn adamdar úshin de keptirilgen óriktiń paıdasy zor. Óıtkeni, atalǵan dáriler adam aǵzasyndaǵy paıdaly tuzdardy shaıyp alyp ketedi. Al bul densaýlyqqa zııan. Keptirilgen órikti únemi paıdalansańyz, aǵzadaǵy magnıı, kaltsıı, kalııdi arttyrýǵa bolady.
Qurma
Dıeta ustaǵanda qurmanyń róli qara órik nemese keptirilgen órik sekildi úlken emes. Óıtkeni, atalǵan jemistermen salystyrǵanda, qurma táttirek. Sondyqtan, tez toıyp qalasyz. Dıeta kezinde sizdiń kúshińiz azaıyp, álsizdenetin kezińiz kóp bolady. Sol kezderde qurma jegen durys. Sebebi, qurmanyń quramyndaǵy V5 dárýmeni sizdiń jumysqa degen qabiletińizdi arttyryp, belgili bir deńgeıde mıdyń jumysyn jaqsartady. Bir sózben aıtqanda, eger siz isker ári belsendi adam bolsańyz, qurma sizge kómektesedi. Taǵy bir qyzyqty derekti aıta ketken jón. Pıramıdalardy salý kezinde mysyrlyqtar qurmany kóp jegen. Endi qurmanyń adam azǵasyna paıdasy mol ekenin bile júresizder dep oılaımyn.
Meıiz
Kóp jaǵdaıda meıizdi keptirilgen polıvıtamın dep ataıdy. Sondyqtan, keptirilgen jemistiń bul túri aǵzaǵa óte paıdaly. Óıtkeni, meıizdiń quramynda kóptegen dárýmender men mıkroelementter bar. Odan bólek, meıiz quramynda ıod óte mol sanalady. Al dıeta kezinde ıodtyń qalqansha bezge asa qajet ekenin umytpańyz. Kún saıyn keptirilgen júzim jeý shashtyń qataıýyna áser etedi.
