DENSAÝLYQ: Aranyń shaqqany nege shıpaly?
ASTANA. QazAqparat - Aranyń shaqqany - shıpa. Arany shaqtyrý arqyly emdeý medıtsınada apıterapııa dep atalady, dep jazady «Massaget» portaly.
Eń alǵashqy apıterapııalyq klınıka Máskeýde Mıhaıl Mıronovıch Frenkeldiń bastaýymen ashyldy. Al bizdiń elde keıingi jyldary ǵana qolǵa alyna bastady. Mamandardyń aıtýynsha, aranyń ýymen emdelý arqyly kóptegen aýrý túrlerinen aıyǵýǵa bolady.
Aranyń bizgegi negizinen júıke júıesi, júrek qan-tamyrlary aýrýlary kezinde qoldanylady. Biraq bul emdi aýrý asqynbaı turyp alý kerek. Sonymen qatar, ınsýlt alǵan adamdar, preparattar kómektespegen jandar osy emge júginedi. Aranyń ýly bolatynyn árqashan este ustaý kerek. Protsedýra kezinde qolaısyzdyq týmas úshin adamdar medıtsınalyq tekserýden ótip kelýi kerek. Ásirese, qan kórsetkishine nazar aýdarylady. Alǵashynda 5 sekýnttaı ǵana shaqtyryp allergııasy bar joǵy baqylanady.
Al aramen emdeý kýrsy onyń sanyna táýeldi. Eń azy 30 aradan bastap, 70, 150 araǵa deıin shaqtyryp dertke shıpa tabýǵa bolady. Tek eskeretin jaıt, bir kúnde 12 aradan artyq shaqtyrýǵa bolmaıdy. Mólsheri tym kóp bolsa ýlanyp qalý qaýpi bar. Sol sebepti de tikeleı mamannyń baqylaýymen júzege asady.
Aranyń bizgegin alyp qarasaq tarmaqtyń basynda onyń ýyna toly qaltasha bar. Bul qaltashanyń ishi 30 mınýtta bosaıdy, ıaǵnı ara shaqqannan keıin tindi adam denesinde qaltasha bos qalǵansha 30 mınýt ustaýǵa bolady degen sóz.
Bul jándiktiń arqasynda emdelip júrseńiz mamandar tarapynan usynylatyn myna keńesterdi esten shyǵarmańyz:
• ýaqytymen tamaqtaný;
• em-sharaǵa ashqarynda kelýge bolmaıdy;
• allergııalyq reaktsııalar týdyratyn taǵamdardan bas tartý kerek;
• tsıtrýsty jemister, shokolod, qoıý shaı men kofe, ishimdik ishýge tyıym salynady;
• bal jeýge ruqsat.
Bul jándiktiń óte eńbekqor ekenin bilemiz. Adamnyń da uzaq jasaýyna yqpaly bar bul jándik shaǵyp alsa shoshymańyz, tek shıpaly bolsyn deńiz.
