DENSAÝLYQ: «Aqyldy telefon» jasóspirimderdiń minezin buzady
ASTANA. QazAqparat - Shveıtsarııadaǵy Bazel Ýnıversıteti ǵalymdary 300-ge tarta jasóspirimdi qatystyra otyryp, qazirgi zamandaǵy aqyldy uıaly telefondardyń densaýlyqqa áserin anyqtaý úshin arnaıy ǵylymı-zertteý jumystaryn júrgizdi. Zertteý nátıjesi boıynsha, smartfondar bozbala men boıjetkendi kúızeliske shaldyqtyratyny anyqtaldy, dep jazady sheteldik BAQ.
Zertteýshilerdiń aıtýynsha, smartfon ıeleri túnde ınternette uzaq otyryp, uıqysyzdyqqa daǵdylanyp ketedi. Sonymen qatar, qarapaıym telefony barlarǵa qaraǵanda smartfon ıeleri eki ese artyq telefonyn «shuqylaıdy». Ǵalymdardyń aıtýynsha, zertteý ýaqytynda jastardyń deni smartfon arqyly túnde vıdeolardy jıi qarap, onlaında kóp otyryp qalady. Qoryta kelgende zertteýshiler túnde smartfon paıdanalanýshylardyń uıqysy buzylyp, kúızeliske dýshar bolatynyn eskertedi. Uıqynyń buzylýy adamnyń minezine de áser etetini belgili. Sondyqtan, ǵalymdar jasóspirimderdiń qolyndaǵy uıaly telefondy ata-anasy keńes bere otyryp, uıyqtar aldynda eki saǵat buryn sóndirip tastaýǵa shaqyrady.
