Densaýlyqqa monıtorıng: Oqýshylardyń shamamen 40%-y kóz aýrýlaryna shaldyqqan
ASTANA. KAZINFORM — Qazaqstanda mektepter men balalar mekemelerinde balalardyń densaýlyǵy men qaýipsizdigin qamtamasyz etý maqsatynda sanıtarııalyq baqylaý kúsheıtildi. Endi ár mektepte partalar men oryndyqtardan bastap jaryqtandyrý men mıkroklımatqa deıin tekseriledi.
Bul týraly Ortalyq kommýnıkatsııalar qyzmetinde ótken brıfıngte QR DSM «Ulttyq qoǵamdyq densaýlyq saqtaý ortalyǵy» basqarma tóraǵasynyń orynbasary Manar Smaǵul habarlady.
Spıkerdiń aıtýynsha, balalar — eń osal topqa jatady jáne olar memleket tarapynan erekshe qorǵaýdy qajet etedi.
— Bizdiń monıtorıng nátıjelerimizge sáıkes, ótken jyly jalpy bilim beretin mektepterde oqıtyn balalardyń 7%-ynda tirek-qımyl apparatynyń, kórý jáne júıke júıesiniń ártúrli patologııalary anyqtaldy. Aýrýlardyń basym bóligi — kórý organdarynyń aýrýlary (shamamen 40%), júıke júıesiniń patologııalary (9,4%) jáne skolıoz (6%) — dedi Manar Smaǵul.
Onyń aıtýynsha, atalǵan patologııalardyń damýyna negizgi sebepter — partada uzaq ýaqyt otyrý jáne jıhazdyń durys ornalastyrylmaýy. Atalǵan aýrýlardyń aldyn alý jáne syrqattanýshylyq deńgeıin tómendetý maqsatynda josparly tekserýler men monıtorıng barysynda partalar men oryndyqtardyń oqýshylardyń boıyna sáıkestigi, olardyń synyptarda durys ornalastyrylýy, taqta men alǵashqy qatarlardyń araqashyqtyǵy baǵalanady, sondaı-aq úı-jaılarda jaryqtandyrý deńgeıi, mıkroklımat jáne shý deńgeıi tekseriledi.
Sonymen qatar, ótken jyly respýblıkada qyzylshanyń 4 240 jaǵdaıy tirkelgen, olardyń 3,5 myńnan astamy balalar men jasóspirimderge tıesili. Ekpe saldyrmaǵandardyń úlesi shamamen 80%-dy quraıdy.
— Infektsııanyń odan ári taralýyna jol bermeý úshin vaktsına almaǵan balalar men jasóspirimder ýaqytynda anyqtalyp, ata-analarǵa ımmýndaýdyń mańyzdylyǵy túsindiriledi. Bul derekter balalar mekemelerinde baqylaýdy kúsheıtýdiń áleýmettik mańyzdy jáne basym baǵyt ekenin kórsetedi, — dep tolyqtyrdy Manar Smaǵul.
Aıta keteıik, jospardan tys tekserýge qalaı ótinish berýge bolatyny týraly jazdyq.