Densaýlyqqa qaýipti jaǵdaılardy kórsetetin karta iske qosyldy
ASTANA. KAZINFORM – Halyq densaýlyǵyna tónetin qaýipterdi aldyn ala anyqtaýǵa múmkindik beretin Saqbol onlaın-kartasy ázirlendi. Bul týraly QR Densaýlyq saqtaý mınıstrligine qarasty Qoǵamdyq densaýlyq saqtaý ulttyq ortalyǵynyń basqarma tóraǵasy Erık Baıjúnisov málimdedi.
Onyń aıtýynsha, qazirgi tańda adamdardyń jıi saparlaýy juqpaly aýrýlardyń shetelden ákeliný qaýpin arttyryp otyr. Osyǵan baılanysty halyqty der kezinde aqparattandyrý jáne qaýipterdiń aldyn alý maqsatynda arnaıy tsıfrlyq qural iske qosylǵan.
– Qazaqstan azamattary jıi baratyn elder boıynsha juqpaly aýrýlardyń aldyn alý jóninde usynymdar ázirlendi. Osy keńesterdi saqtaý ınfektsııa juqtyrý qaýpin azaıtyp, olardyń elge ákelinýiniń aldyn alýǵa múmkindik beredi, – dedi Erık Baıjúnisov OKQ alańynda ótken baspasóz konferentsııasynda.
Saqbol onlaın-kartasynda el ishindegi jáne sheteldegi epıdemıologııalyq jaǵdaı, tabıǵı jáne klımattyq erekshelikter, sondaı-aq tehnogendik qaýipter týraly málimetter jınaqtalǵan. Bul paıdalanýshylarǵa sapar aldynda táýekelderdi baǵalap, qajetti saqtyq sharalaryn qabyldaýǵa múmkindik beredi.
Aıta keteıik, elde juqpaly aýrýlardyń aldyn alý maqsatynda biryńǵaı ımmýnoprofılaktıka ortalyǵyn qurý josparlanyp, ımmýndaý júıesin tsıfrlandyrý jumystary júrgizilip jatyr.
