Densaýlyq salasyndaǵy derekti jınaý jáne saqtaý júıesi jetildirilmek
ASTANA. Kazinform – QR DSM densaýlyq saqtaý salasyndaǵy medıtsınalyq jáne ákimshilik derekterdi jınaýdy jetildirýge jáne qamtamasyz etýge baǵyttalǵan buıryq jobasyn jarııalady. Joba Ashyq normatıvtik quqyqtyq aktilerdiń ınternet-portalynda ornalastyryldy.
Qujatqa saı «Tsıfrlyq densaýlyq saqtaý sýbektileriniń derbes medıtsınalyq derekterdi jınaýdy, óńdeýdi, saqtaýdy, qorǵaýdy jáne berýdi júzege asyrý qaǵıdalaryn bekitý týraly» QR Densaýlyq saqtaý mınıstriniń 2021 jylǵy 14 sáýirdegi № QR DSM-30 buıryǵyna tolyqtyrýlar engizý kózdelgen.
Túsindirmede kórsetilgendeı, osy buıryqty qabyldaý Qazaqstan Respýblıkasynyń densaýlyq saqtaý salasyn retteıtin normatıvtik-quqyqtyq aktilerdiń saqtalýyn qamtamasyz etedi, sondaı-aq belgilengen normalar men talaptarǵa sáıkes medıtsınalyq derekterdi esepke alý protsesterin júıelendirýge jáne standarttaýǵa múmkindik beredi.
Ol QR Úkimeti men «DjıI Helskea» JShQ arasyndaǵy «Qazaqstan Respýblıkasynyń aýmaǵynda GE HealthCare joǵary tehnologııaly dıagnostıkalyq medıtsınalyq jabdyǵynyń jańa óndirisin uıymdastyrý, GE HealthCare jabdyǵyna servıstik qyzmet kórsetý salalaryndaǵy yntymaqtastyqty damytý, medıtsına jumyskerlerin GE HealthCare jabdyǵyn paıdalanýǵa oqytý jáne Qazaqstan Respýblıkasy densaýlyq saqtaý júıesiniń tsıfrlyq ınfraqurylymyn jańǵyrtý boıynsha ınvestıtsııalyq jobany iske asyrý jónindegi bazalyq qaǵıdattar týraly negizdemelik kelisimge qol qoıý týraly» Qazaqstan Respýblıkasy Úkimetiniń 2023 jylǵy 19 qyrkúıektegi № 811 qaýlysyna sáıkes ázirlendi.
Joba patsıentterdiń aýrý jaǵdaılaryn tıimdi esepke alý, medıtsınalyq kómekti qoldaýdy qamtamasyz etý, medıtsınalyq kómek kórsetý protsesterin ońtaılandyrý, sondaı-aq basqa uıymdarmen ákimshilik ózara is-qımyl jasaý úshin qajetti densaýlyq saqtaý salasyndaǵy medıtsınalyq jáne ákimshilik derekterdiń tizbesin aqparattyq júıelerde jınaý jáne óńdeý júıesin jetildirý maqsatynda daıyndaldy.
Buıryq jobasyn iske asyrý respýblıkalyq bıýdjetten qarajat bólýdi kózdemeıdi. Oǵan engizilgeli otyrǵan ózgeristermen myna silteme arqyly tanysýǵa bolady.