Densaýlyq saqtaýdy tsıfrlandyrý: jarty jylda 1,8 mln qashyqtan medıtsınalyq qyzmet kórsetildi
ASTANA. KAZINFORM — 2025 jyldyń alǵashqy jartyjyldyǵynda Qazaqstan halqy úshin 1,8 mıllıonǵa jýyq qashyqtan medıtsınalyq qyzmet kórsetilgen. Bul jalpy kórsetiletin qyzmetterdiń 8,35%-yn quraıdy.
Densaýlyq saqtaý vıtse-mınıstri Erbol Ospanovtyń aıtýynsha, patsıentterdi sáıkestendirýdiń tsıfrlyq quraldaryn engizý aıasynda elimizdegi medıtsınalyq uıymdardyń 80%-y qajetti veb-kameralarmen jabdyqtalǵan. Tsıfrlyq sáıkestendirýden ótken patsıentterdiń úlesi 79%-ǵa jetken.
Sonymen qatar, «Áleýmettik ámııan» arqyly dári-dármekpen qamtamasyz etý tetigi jalǵasyp jatyr. Jyl basynan beri jazylǵan retseptilerdiń 76,3%-y qamtamasyz etilgen.
- Tsıfrlandyrýdy arttyrý jónindegi jumys sheńberinde Densaýlyq saqtaý mınıstrligi óńirlik basqarmalarǵa birneshe tapsyrma júktedi. Atap aıtqanda, medıtsınalyq uıymdardy tolyq veb-kameralarmen qamtamasyz etý, patsıentterdi tsıfrlyq sáıkestendirýge kóshirý jáne «Áleýmettik ámııan» arqyly dári-dármekpen qamtýdy jedeldetý qajet, - deıdi spıker.
Aıta keteıik, úsh jyldyń ishinde elimizde 633 densaýlyq saqtaý nysany boı kóterdi.