Densaýlyq saqtaý júıesinde lıtsenzııasyz jumys istegen 40 uıym anyqtaldy
ASTANA. KAZINFORM – Densaýlyq saqtaý mınıstrligi tsıfrlyq quraldardyń kómegimen medıtsınalyq aqparattyq júıelerdegi 400 myń ózektiligin joǵaltqan patsıent kartasyn anyqtap, júıeden alyp tastady.
Bul medıtsınalyq kómek pen dárilik zattarǵa 31 mlrd teńge kóleminde negizsiz shyǵystardyń aldyn alýǵa múmkindik berdi.
Patsıenttiń medıtsınalyq uıymǵa júginýinen bastap medıtsınalyq uıymǵa tólem júrgizýge deıingi derekterdiń durystyǵyn qamtamasyz etetin tutas tizbek qalyptastyryldy. Biryńǵaı qoıma derekterdiń negizgi kózi retinde qyzmet etedi, tsıfrlyq sáıkestendirý patsıenttiń medıtsınalyq kómekke naqty júgingenin rastap, jalǵan málimet engizýge jol bermeıdi, formattyq-logıkalyq baqylaý medıtsınalyq oqıǵany saqtaýǵa deıin tekseredi, al biryńǵaı tólem júıesi kórsetilgen kómektiń kólemi men sapasyn tekseredi.
Osylaısha, nátıje ólshenetin kórsetkishtermen aıqyndaldy. Tólem jasaý kezinde kemshilikterdi anyqtaý deńgeıi 3,5 esege artty. Medıtsınalyq qyzmetterdi negizsiz tutyný 7,1%-ǵa, ıaǵnı shamamen 7 mlrd teńgege tómendedi. 10,6 mlrd teńge kóleminde negizsiz kóterý faktileri anyqtaldy. Jan basyna shaqqandaǵy normatıv boıynsha belsendi emes alýshylarǵa qatysty ǵana áser 3,2 mlrd teńge.
Tsıfrlyq resýrstardy basqarý júıesi arqyly qaýipterge baǵdarlanǵan qadaǵalaý nátıjesinde qoldanystaǵy lıtsenzııasy joq qyzmet júrgizgen shamamen 40 uıym anyqtaldy, olardyń beseýiniń qyzmeti toqtatyldy.
Sonymen qatar jańa júıe alǵash ret sertıfıkattarynyń merzimi ótken 2 myńnan astam mamandy anyqtaýǵa múmkindik berdi, olardyń 50-den astamy jumystan shettetildi.
Densaýlyq saqtaýdyń biryńǵaı tsıfrlyq kontýryn qurý: patsıentke kórsetilgen sapaly medıtsınalyq kómekke qomaqty qarajat degen qarapaıym qaǵıdatty iske asyrýǵa múmkindik beredi.
Aıta ketelik aýrýhanaishilik ınfektsııalar kóbeıdi: mınıstrlik klınıkalarda mindetti aýdıt engizetini týraly jazǵan edik.
