Densaýlyq saqtaý salasynyń ardagerleri men sarapshylar ózekti máselelerdi sheshý jolyn usyndy
ASTANA. KAZINFORM - Elimizdiń barlyq óńirindegi 300-den astam dáriger, medbıkeler, oqytýshylar, ǵalymdar, medıtsınalyq uıymdardyń basshylary, densaýlyq saqtaý salasynyń ardagerleri men sarapshylar «AMANAT» partııasynyń «Dáriger Talks» dıalog alańynda bas qosty. Olar medıtsınalyq qyzmet kórsetý júıesiniń qazirgi jaı-kúıin talqylap, otandyq medıtsınadaǵy ózekti máselelerdi sheshý joldaryn usyndy. Sondaı-aq qatysýshylarǵa partııalyq jáne vedomstvolyq nagradalar tabystaldy.
Jańa dıalog alańynyń alǵashqy jıyny Nazarbayev University medıtsına mektebinde ótti. «Dáriger Talks»-tyń ereksheligi – munda dárigerler densaýlyq saqtaý salasyn damytý aıasynda ómirdegi jáne kásiptegi ózderiniń jeke qalyptasý tarıhymen bólisedi.
Sóz basynda, Májilis spıkeri, «AMANAT» partııasynyń Tóraǵasy Erlan Qoshanov barsha qatysýshyny ótken Medıtsına qyzmetkeri kúnimen quttyqtap, memleket árqashan densaýlyq saqtaý salasyna erekshe nazar aýdaratynyn atap ótti. Ol sondaı-aq partııanyń 70 myńǵa jýyq múshesi – medıtsına salasynyń ókilderi ekenin jáne olar «AMANAT»-tyń mańyzdy tiregi sanalatynyn jetkizdi.
«Memleket basshysynyń usynysymen qaıtadan «Qazaqstannyń eńbek sińirgen dárigeri» memlekettik nagradasy engizildi. Qoǵam dárigerlerimizdiń eren eńbegin baǵalap qana qoımaı, olar týraly egjeı-tegjeıli bilýi kerek dep sanaımyn. Sol sebepti de «AMANAT» partııasy osy «Dáriger Talks» alańyn ashyp otyr. Osy jerde medıtsına qoǵamdastyǵy depýtattyq korpýspen jáne Densaýlyq saqtaý mınıstrligimen birge ashyq dıalog formatynda ózekti máselelerdi talqylap, ony sheshý joldaryn aıqyndaı alady. Bizdiń mindetimiz – ár dárigerdiń únin estirtý», – dedi ol.
Sondaı-aq Erlan Qoshanov jýyrda densaýlyq saqtaý zańnamasyna engizilgen túzetýlerge nazar aýdardy. Bul túzetýlerdi «AMANAT» partııasy ázirledi. Zańda medıtsına qyzmetkerlerine arnalǵan birqatar áleýmettik kepildikter qarastyrylyp, olardyń quqyǵyn qorǵaý jumysy kúsheıtilýde. «AMANAT» partııasynyń Tóraǵasy dárigerlerge qol jumsaý oqıǵalary jıilep bara jatqanyna jeke toqtaldy.
«Mundaı áreketterdi aqtap alýǵa bolmaıdy. Sondyqtan biz barlyq deńgeıdegi medıtsına qyzmetkerleri úshin qaýipsiz eńbek jaǵdaıyn qamtamasyz etý baǵytynda jumys istep jatyrmyz. Depýtattar – «AMANAT» fraktsııasynyń músheleri medıtsına qyzmetkerlerin qorǵaý maqsatynda Qylmystyq kodekske túzetýler engizýge bastamashy boldy. Jaqyn arada biz medıtsına qyzmetkerlerin qorǵaýdy zań júzinde kúsheıtemiz», – dedi Erlan Qoshanov.
Kezdesýge qatysýshylar Prezıdent Joldaýy men onyń saılaýaldy baǵdarlamasyn, sondaı-aq «AMANAT» partııasynyń saılaýaldy baǵdarlamasyn júzege asyrý qorytyndysy boıynsha medıtsına qyzmetkerlerin qoldaý jáne jalpy densaýlyq saqtaý salasyn damytý boıynsha buryn-sońdy bolmaǵan oń sharalar qolǵa alynyp jatqanyna nazar aýdardy.
«Memleket basshysynyń tapsyrmasy boıynsha 2020-2023 jyldar aralyǵynda medıtsına qyzmetkerleriniń jalaqysy kezeń-kezeńimen ósti. Máselen, dárigerlerdiń eńbekaqysy 3 eseden astam joǵarylasa, orta medıtsına qyzmetkerleriniń jalaqysy 2 eseden astam ósti. Bul degenimiz – 270 myńnan astam otandasymyz ben olardyń otbasy músheleri», – dedi Densaýlyq saqtaý mınıstri Aqmaral Álnazarova.
Aýyldaǵy dáriger tapshylyǵy máselesin sheshý úshin aýyldyq jerge kóship barǵan mamandarǵa 100 AEK mólsherinde kóterme járdemaqy tólenedi. Densaýlyq saqtaý máseleleri jónindegi zańǵa engizilgen bul norma «AMANAT» partııasynyń saılaýaldy baǵdarlamasynda kózdelgen.
«Eńbegim baǵalanatyn ári suranysqa ıe bolatyn jumys ornyn izdedim. Aýyldyq jerde árdaıym dáriger kerek. Osynda kómegim shynymen qajet ekenin sezindim. Kóterme járdemaqy alyp, baspanaǵa da qol jetkizdim. Biraq men úshin eń qundy dúnıe – jergilikti turǵyndardyń ystyq yqylasy, olardyń janǵa jaıly ortasy men kórsetip jatqan qoldaýy», – dedi Pavlodar oblysy Prıırtyshsk aýylyndaǵy jalpy tájirıbe dárigeri Zakır Baratov.
Óz kezeginde, «Ómir tynysy» transplantatsııa jasalǵan adamdardy ońaltý birlestiginiń tóraǵasy Jánibek Ospanov donor máselesine toqtaldy. Onyń ózine de osydan 10 jyldan astam ýaqyt buryn júrek transplantatsııasy jasaldy.
«Donor bolý – oılanyp, tolǵanyp baryp jasalatyn mańyzdy qadam ekenin túsingen jón. Máselen, men ómirden ozǵan soń qandaı da bir aǵzam ózge adamnyń ómirin jalǵap, ol eki-úsh balaly bolsa – ómir jalǵasy degenińiz osy emes pe? Ár adam donorlyqqa qatysty kózqarasty túsinýi kerek», - dedi ol.
«Dáriger Talks» qatysýshylary densaýlyq saqtaý salasyna jáne áleýmettik salaǵa qatysty birqatar bastama kóterdi. Іs-shara barysynda Almaty oblysy Uzynaǵash aýylynyń dáriger-reabılıtology Ásel Saýryqova, Túrkistan qalasynyń dáriger-terapevti Kamagúl Musaqojaeva, Qostanaı oblysynyń bas balalar hırýrgi Igor Belobrjıtskıı, Astana qalasynyń LOR-dárigeri Medet Mahanbet, Shyǵys Qazaqstan oblysy Aqjar aýylynyń travmatolog-ortoped dárigeri, PhD doktory Eljan Manarbekov, Kókshetaý qalasynyń feldsheri Gúlnaz Bókesh, «University Medical Center» basqarma tóraǵasynyń orynbasary Mahabbat Bekbosynova jáne ózge de azamattar sóz sóıledi. Otyrys moderatory – dáriger, tanymal telejúrgizýshi Aınur Tájına.
Kezdesý sońynda «AMANAT» partııasynyń tóraǵasy Erlan Qoshanov, Densaýlyq saqtaý mınıstri Aqmaral Álnazarova jáne Qazaqstan densaýlyq saqtaý menedjerleri qaýymdastyǵy keńesiniń tóraǵasy Qýanysh Erǵalıev kásibı qyzmetindegi eseli eńbegi úshin birqatar medıtsına qyzmetkerin marapattady.
