Densaýlyq saqtaý salasynda qandaı ózgerister boldy
ASTANA. KAZINFORM – Qazaqstanda densaýlyq saqtaý júıesin jańǵyrtý aıasynda aýyldyq jerlerde júzdegen jańa medıtsınalyq nysan paıdalanýǵa berilip, dárigerlerdi qoldaý sharalary kúsheıtildi. Sonymen qatar dári-dármek óndirisin damytý men medıtsınany tsıfrlandyrý baǵytynda aýqymdy jobalar júzege asyrylyp jatyr, dep habarlaıdy Úkimet.
Úkimettiń málimetinshe, Memleket basshysynyń tapsyrmasy boıynsha aýyldyq densaýlyq saqtaý júıesin jańǵyrtý sheńberinde elimizdiń óńirlerinde 655 jańa alǵashqy medıtsınalyq-sanıtarııalyq kómek nysany, onyń ishinde dárigerlik ambýlatorııalar men feldsherlik-akýsherlik pýnktter salyndy. Budan bólek, 12 medıtsınalyq mekeme tolyq jańǵyrtýdan ótip, aýyl turǵyndaryna mamandandyrylǵan kómek kórsetýge múmkindik aldy.
– Aýyldyq jerlerdegi kadr tapshylyǵyn azaıtý úshin keminde bes jyl jumys isteýge kelisim bergen 529 tapshy beıindegi dárigerge 8,5 mln teńgeden birjolǵy kóterme tólem berildi. Sonyń nátıjesinde aýyldaǵy dárigerler tapshylyǵy 13,8%-ǵa, al orta medıtsına qyzmetkerleriniń tapshylyǵy 1%-ǵa tómendedi, – delingen Úkimet aqparatynda.
Sonymen qatar ınternatýrada 6 jańa bazalyq mamandyq, rezıdentýrada 14 tar beıindi balalar mamandyǵy ashyldy.
Dárigerlerdiń qaýipsizdigin qamtamasyz etý maqsatynda medıtsına qyzmetkerleri men jedel járdem brıgadalaryna kúsh kórsetý nemese qaýip tóndirý úshin qylmystyq jaýapkershilik engizildi. Qazirgi tańda 152 statsıonarda táýlik boıy polıtsııa beketteri jumys isteıdi. Al Astana men Almatyda jedel járdem qyzmetkerleri beınetirkegishtermen qamtamasyz etilip, bul janjaldar sanyn 90%-ǵa azaıtqan.
– Bir jylǵa arnalǵan dári-dármek satyp alý josparynyń kólemi 584,1 mlrd teńgeni qurady. Qazaqstandyq óndiristegi 66 dárilik preparat boıynsha júrgizilgen kelissózderdiń nátıjesinde bıýdjetten 10,3 mlrd teńge únemdeldi. Bıylǵy birinshi toqsanda farmatsevtıkalyq óndiris kólemi 70,8 mlrd teńgege jetip, ótken jylmen salystyrǵanda 46%-ǵa ósti, – dep málimdedi Úkimet.
Qazirgi ýaqytta elde 209 otandyq farmatsevtıkalyq óndirýshi tirkelgen. Onyń ishinde 43 kásiporyn daıyn dárilik preparattar shyǵarady.
Sondaı-aq Úkimet Pfizer, Hoffmann-La Roche jáne AstraZeneca kompanııalarymen uzaqmerzimdi kelisimder jasap, otandyq kásiporyndarmen jalpy quny 125,4 mlrd teńgege 83 kelisimshartqa qol qoıǵan. Budan bólek, 2029 jylǵa qaraı ishki naryqtaǵy otandyq dárilerdiń úlesin 50%-ǵa jetkizý maqsatynda 391,3 mlrd teńgege alty iri ınvestıtsııalyq kelisim júzege asyrylýda.
Medıtsına salasyn tsıfrlandyrý aıasynda E-Densaulyq biryńǵaı platformasyna 23 aqparattyq júıe biriktirilip jatyr. Sonymen qatar kólemi 1,5 petabaıt bolatyn biryńǵaı medıtsınalyq derekter qoımasy iske qosylýda.
– 1 shildeden bastap medıtsınalyq qyzmetterdi qarjylandyrý tek biryńǵaı repozıtorııdegi verıfıkatsııalanǵan derekter negizinde júrgiziledi. Bul jalǵan eseptiliktiń aldyn alyp, dárigerlerge «bir tereze» qaǵıdaty boıynsha jumys isteýge múmkindik beredi jáne ákimshilik júktemeni eki esege deıin azaıtady, – delingen Úkimet habarlamasynda.
Aıta keteıik, Qazaqstanda 1,7 mln adam júrek-qantamyr aýrýlaryna tekserýden ótti.
