Densaýlyq saqtaý salasynda qandaı mamandar jetispeıdi
ASTANA. KAZINFORM – Densaýlyq saqtaý ınfraqurylymynyń tsıfrlyq kartasy ázirlenedi. Bul týraly Úkimet otyrysynda Densaýlyq saqtaý mınıstri Aqmaral Álnazarova aıtty.
«Respýblıka boıynsha medıtsınalyq tehnıkamen jaraqtandyrý deńgeıi 80 paıyz quraǵanymen, olardyń tozý kórsetkishi joǵarǵy deńgeıde qalyp otyr. Densaýlyq saqtaý júıesinde 270 myńnan astam medıtsına qyzmetkeriniń 80 myńnan astamy dárigerler bolýyna qaramastan, olardyń tapshylyǵy azaımaı otyr. Onyń ishinde terapevt, anestezıolog-reanımatolog, akýsher-gınekolog dárigerleriniń tapshylyǵy baıqalady», - dedi mınıstr.
Onyń atap ótýinshe, munyń barlyǵy densaýlyq saqtaý júıesiniń ınfraqurylymyn josparlaý kezindegi kemshilikterdiń bolýyn dáleldeıdi jáne kezekti mynadaı is-sharalar júrgizýdi qajet etedi:
- statsıonarlyq kómekti tutynýdyń jas shamasy normatıvterin engizý jáne ınstıtýtsıonaldyq bazany jetildirý;
- ınfraqurylym nysandaryn zamanaýı jabdyqtarmen jáne tehnologııalarmen jaraqtandyrý júıesin jetildirý;
- jergilikti atqarýshy organdar tarapynan kórsetetin áleýmettik qoldaý sharalaryn biryńǵaılandyrýdy, densaýlyq saqtaý salasy mamandarynyń tapshylyǵyn eskere otyryp, kadrlyq resýrstarmen qamtamasyz etýdi boljaý júıesin jetildirý.
«Infraqurylymdy josparlaý protsesi demografııalyq jáne halyqtyń aýrýshańdyq kórsetkishterine uzaq merzimdi boljamdaryna negizdeledi. Osy is-sharalardy tıimdi iske asyrý úshin qajetti normatıvtik quqyqtyq aktiler qabyldanyp, qoldanystaǵy aqparattyq júıe bazasynda densaýlyq saqtaý ınfraqurylymynyń tsıfrlyq kartasy ázirlenedi. Bul óz kezeginde ınfraqurylymdy ońtaıly josparlaýdy, monıtorıng júrgizýge múmkindik beredi», - dedi ol.
