Densaýlyq saqtaý salasyna memlekettik-jekemenshik áriptestik tetigi arqyly qarjy tartylady
ASTANA. KAZINFORM – Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda densaýlyq saqtaý salasyna memlekettik-jekemenshik áriptestik tetigi arqyly qarjy tartýdyń halyqaralyq tájirıbesi eskerilmeı jatqanyn synady.
«Elimizdegi densaýlyq saqtaý salasyn damytý úshin memlekettik-jekemenshik áriptestik tetikteri arqyly resýrstardy belsendi tartý qajet. Ókinishke qaraı, shetelderdiń memlekettik-jekemenshik áriptestikke qatysty ozyq tájirıbeleri zańnamamyzda tolyq kórinis tapqan joq. Munyń bári jobalardyń tıimsiz bolýyna, bıýdjetke túsetin salmaqtyń tym artýyna ákep soqtyrady. Bul tásilderdi qaıta qarap, ınvestıtsııa tartý úshin aqylǵa qonymdy tarıfter usyný qajet. Úkimet densaýlyq saqtaý jáne bilim berý salasyndaǵy memlekettik-jekemenshik áriptestikke qatysty jańa normatıvter men erejeler ázirleýi kerek», - dedi Memleket basshysy.
Qasym-Jomart Toqaev bilikti medıtsına mamandarynyń tapshylyǵy áli de ózekti másele ekenin aıtady.
«Bul máseleni sheshý úshin, eń aldymen, medıtsına salasyndaǵy bilim sapasyn barynsha arttyrǵan jón. Sonyń ishinde grant qunyn bilim berý úderisteriniń deńgeıine qaraı saralaý arqyly belgilep, tıimdi taratý qajet», - dedi Prezıdent.
