Densaýlyq saqtaý salasyna aıtylatyn syndy tsıfrlandyrý arqyly sheshýge bolady – Erbol Ospanov
ASTANA. KAZINFORM – Densaýlyq saqtaý vıtse-mınıstri Erbol Ospanov densaýlyq saqtaý salasynda sheshimin tabýy tıis eń basty úsh máseleni atady.
- Jalpy, densaýlyq saqtaý salasyn tsıfrlandyrý, transformatsııalaý máselesin alar bolsaq, baıaý kele me, jyldam kele me, oǵan baǵa bere almaımyn. Josparymyz bar. Densaýlyq saqtaý vıtse-mınıstr bolyp taǵaıyndalǵan kezde aldyma maqsattar qoıylǵan, soǵan jetý qajet. Densaýlyq saqtaý mınıstrligi, Jasandy ıntellekt mınıstrligi jáne basqa vedomstvolar sol maqsat aıasynda jumys istep jatyrmyz. Ózderińiz bilesizder, áleýmettik jelide de, buqaralyq aqparat quraldarynda da Densaýlyq saqtaý mınıstrligi, onyń óńirlik qurylymdary ártúrli synǵa ushyrap jatady. Onyń bári birinshi kezekte tsıfrlandyrýdyń aıasynda sheshiletin máseleler. Osy baǵyttaǵy josparymyz - azamattarǵa medıtsınalyq qyzmetterdiń qoljetimdiligin jaqsartý. Óıtkeni, synnyń biri – medıtsınalyq qyzmetterdiń qoljetimsizdigi. Kezekte turamyz, uzaq kútemiz, dárigerler joq dep jatady, - dedi vıtse-mınıstr Kazinform agenttiginiń BIZDIÑ ORTA podkastynda.
Ol saladaǵy ekinshi másele retinde medıtsınalyq qyzmetkerlerge júktemeniń kóptigin atady.
- Azamattardy emdeýdiń ornyna aqparattyq júıelermen jumys isteıdi ne qaǵazbastylyq bar. Bir adamdy 15-20 mınýttyń ornyna 30-40 mınýt qabyldaıdy. Sebebi aqparattyq júıeni toltyrý, 1 aqparattyń júıeniń ornynan 2-3 júıemen jumys isteý sııaqty máseleler bar. Sony qurtý qajet. Medıtsına qyzmetkeri patsıentti qabyldanǵanda jeńil jáne tez qyzmet kórsetýi tıis, - dedi ol.
Erbol Ospanovtyń aıtýynsha, úshinshi másele densaýlyq saqtaý salasyna bólinetin qarajaty únemdi paıdalanýǵa qatysty.
- Óıtkeni, kóp qarajat bólinedi. Máselen, 2025 jyly densaýlyq saqtaý salasyna 3 trln teńge bólindi. Sol qarajaty únemdeý paıdalaný, maqsatsyz paıdalanýǵa jol bermeý qajet. ony avtomatty júıe arqyly baqylap, protsesterdi ońtaılandyrý kerek. Osy úsh baǵytta jumys istep jatyrmyz. Biraz jumys jaaldy. 2024 jyly densaýlyq saqtaý salasyndaǵy aqparattyq júıelerge taldaý jasadyq. Taldaý barysynda 20-dan astam memlekettik aqparattyq júıe bar ekenin, onyń bári bir-birimen tolyq yqpaldastyrylmaǵanyn, bir qyzmetti 2-3 júıe qaıtalaıtynyn anyqtadyq. Solardy ońtaılandyrý qajet. Bul jumysty bıyl bastadyq. 2026 jyldyń 1-toqsanynda biraz joba óz máresine jetetindigine senimdimiz. Sol jetistikke jetsek, joǵaryda atalǵan 3 máseleniń birqatary sheshiledi, - dedi ol.
Aıta keteıik, Áleýmettik ámııan arqyly 13 mln-nan astam dári-dármek retsepti tsıfrlyq túrde berildi.