Densaýlyq saqtaý resýrstaryn basqarýdyń biryńǵaı tsıfrlyq platformasy iske qosyldy

Qazaqstan Respýblıkasy Densaýlyq saqtaý mınıstrligi alǵash ret densaýlyq saqtaý resýrstaryn basqarýdyń biryńǵaı tsıfrlyq platformasyn engizdi.

Bul — medıtsınalyq uıymdar, medıtsına qyzmetkerleri, medıtsınalyq tehnıka, ınfraqurylym jáne salanyń ózge de resýrstary týraly málimetterdi bir tsıfrlyq keńistikte biriktiretin Zııatkerlik densaýlyq saqtaý platformasy (Health Intelligence Platform).

Platformany qurý Memleket basshysynyń densaýlyq saqtaý júıesin tsıfrlyq transformatsııalaý jónindegi tapsyrmalaryn iske asyrýdaǵy mańyzdy qadam boldy.

ZDP iske qosylǵanǵa deıin sala resýrstary týraly aqparat túrli aqparattyq júıelerde saqtaldy. Bul derekterdiń qaıtalanýyna, jaǵdaıdy taldaýdyń kúrdelenýine jáne basqarýshylyq sheshimderdi qabyldaý úderisiniń baıaýlaýyna alyp keldi. Endi barlyq negizgi málimetter biryńǵaı júıede shoǵyrlandyrylyp, el boıynsha jaǵdaıdy naqty ýaqyt rejımine barynsha jaqyn formatta obektıvti baǵalaýǵa múmkindik beredi.

Jańa platforma ne beredi

Jańa platforma Densaýlyq saqtaý mınıstrligi men óńirlerge densaýlyq saqtaý júıesiniń jaı-kúıi týraly tolyq aqparat alýǵa múmkindik beredi: qansha medıtsınalyq uıym jumys isteıdi, olardyń dárigerlermen, orta medıtsına qyzmetkerlerimen, medıtsınalyq tehnıkamen jáne ınfraqurylymmen qamtamasyz etilý deńgeıi qandaı.

Іs júzinde árbir medıtsınalyq uıymnyń lıtsenzııalary, kadrlyq quramy, jabdyqtary, ǵımarattary, bólimsheleri, tósek-oryn qory jáne basqa da qajetti málimetteri qamtylǵan biryńǵaı «tsıfrlyq pasporty» qalyptastyrylady.

Medıtsınalyq tehnıkany basqarýǵa erekshe nazar aýdarylǵan. Júıe jabdyqtyń satyp alynǵan sátinen bastap tehnıkalyq qyzmet kórsetý, jóndeý jáne tozý deńgeıine deıingi búkil ómirlik tsıklin qadaǵalaıdy. Bul jabdyqtardy ýaqtyly jańartýǵa jáne memlekettik qarajatty tıimdi paıdalanýǵa múmkindik beredi.

Búginde júıede densaýlyq saqtaý salasynyń negizgi tsıfrlyq tizilimderi men servısteri iske asyrylǵan:

• Medıtsınalyq uıymdar tizilimi — medıtsınalyq uıymnyń tsıfrlyq pasporty, lıtsenzııalary, ǵımarattary, qurylymdyq bólimsheleri, kabınetteri, palatalary, tósegi jáne kóligi;
• Kadrlyq resýrstar tizilimi — shtattyq keste, qyzmetkerler, eńbek qatynastary, mamandardyń sertıfıkattary, bilimi, kásiptik tirkelimi, stýdentter, rezıdentter jáne magıstranttar týraly málimetter;
• Medıtsınalyq tehnıka tizilimi — jabdyqtyń tolyq ómirlik tsıkli: esepke alý, tehnıkalyq qyzmet kórsetý, jóndeý, qaldyq quny, tozý deńgeıi jáne esepke alý júıelerimen ıntegratsııa.

Artyq bıýrokratııasyz sapany baqylaý

Eń mańyzdy jańashyldyqtardyń biri — medıtsınalyq kómektiń sapasyna tsıfrlyq postlıtsenzııalyq baqylaýdyń engizilýi.

Endi Medıtsınalyq jáne farmatsevtıkalyq baqylaý komıtetiniń mamandary kóptegen kóshpeli tekserý júrgizbeı-aq medıtsınalyq uıymdardyń qyzmetin qashyqtan baǵalaı alady.

Júıe avtomatty túrde mynadaı negizgi kórsetkishterdi taldaıdy:

* lıtsenzııalyq talaptarǵa sáıkestigi;
* mamandardyń qoldanystaǵy sertıfıkattarynyń bolýy;
* kadrlarmen jáne medıtsınalyq tehnıkamen qamtamasyz etilýi.

Mundaı tásil qaýipterdi ýaqtyly anyqtaýǵa, buzýshylyqtardyń aldyn alýǵa jáne medıtsınalyq uıymdarǵa anyqtalǵan kemshilikterdi jedel joıýǵa múmkindik beredi. Barlyq usynym avtomatty túrde tsıfrlyq júıege jiberilip, olardyń oryndalýy turaqty baqylaýda bolady.

— Júıeni tsıfrlyq postlıtsenzııalyq baqylaý sheńberinde pılottyq iske asyrý barysynda lıtsenzııalyq talaptarǵa sáıkes kelmeıtin 38 medıtsınalyq uıym anyqtaldy. Sonymen qatar avtomatty monıtorıngtiń arqasynda jaramdylyq merzimi ótken sertıfıkattary bar medıtsına qyzmetkerleriniń sany shamamen úshten birge qysqaryp, 3 637-den 2 448 mamanǵa deıin azaıdy. Bul patsıentterge belgilengen biliktilik talaptaryna sáıkes keletin mamandardyń medıtsınalyq kómek kórsetýine yqpal etedi, — delingen habarlamada.

Jańa ZDP memlekettik derekter qorlarynan, elektrondyq lıtsenzııalaý júıesinen, bilim berý tizilimderinen, eńbek sharttarynyń biryńǵaı júıesinen, jyljymaıtyn múlik bazalarynan, medıtsınalyq aqparattyq júıelerden jáne basqa da tsıfrlyq servısterden qajetti málimetterdi avtomatty túrde alady.

Osynyń nátıjesinde aqparatty qolmen engizý kólemi edáýir qysqaryp, derekterdiń qaıtalanýy joıylady jáne olardyń naqtylyǵy artady.

Tsıfrlyq platforma salany basqarýdyń taldaýlyq negizine aınalady

Platforma sondaı-aq densaýlyq saqtaý nysandarynyń tsıfrlyq kartasyn, taldamalyq panelderdi, joǵary tehnologııalyq medıtsınalyq kómekti basqarý quraldaryn, patsıentterdi qoldaý servısterin jáne medıtsınalyq kómektiń sapasyna táýelsiz saraptama júrgizý tetikterin qamtıdy.

Nátıjesinde Densaýlyq saqtaý mınıstrligi árbir óńirdegi jaǵdaıdy jedel taldaýǵa, medıtsına kadrlaryna degen qajettilikti boljaýǵa, medıtsınalyq tehnıkany satyp alýdy josparlaýǵa jáne obektıvti derekter negizinde basqarýshylyq sheshimder qabyldaýǵa múmkindik alady.

Densaýlyq saqtaý resýrstaryn basqarýdyń ortalyqtandyrylǵan tsıfrlyq platformasyn engizý búkil sala úshin biryńǵaı aqparattyq keńistik qalyptastyrady. Júıeni engizý basqarýdyń ashyqtyǵyn arttyrýǵa, memlekettik qarajatty paıdalaný tıimdiligin kóterýge, zamanaýı taldaýdy damytýǵa jáne senimdi derekterge negizdelgen basqarýshylyq sheshimder qabyldaýǵa berik negiz qalyptastyrýǵa yqpal etedi.

Buǵan deıin Qazaqstanda ınklıýzıvti tsıfrlyq platforma ázirlengeni belgili boldy.