Densaýlyq saqtaý nysandarynda eresekterge arnalǵan 11 myń tósek-oryn tıimsiz paıdalanylady
ASTANA. KAZINFORM – Elimizde medıtsınalyq nysandardyń tozýy joǵary deńgeıde. Bul týraly Úkimet otyrysynda Densaýlyq saqtaý mınıstri Aqmaral Álnazarova aıtty.
«Qazaqstan Respýblıkasynyń densaýlyq saqtaý ınfraqurylymyn damytý tujyrymdamasynyń jobasy Memleket basshysynyń tapsyrmasyn oryndaý aıasynda ázirlenip, aldaǵy ýaqytqa salanyń negizgi mindetterin, tásilderin jáne damý prıntsıpterin aıqyndaıdy. Qazirgi kezde respýblıkada 7 337 densaýlyq saqtaý nysany medıtsınalyq qyzmet kórsetedi. Onyń ishinde 663 statsıonarlyq, al 6 674 alǵashqy medıtsınalyq-sanıtarııalyq kómek kórsetý nysany bar. Sońǵy 5 jylda 400-den astam medıtsınalyq nysan qurylysy salynyp, 36 paıyzdan astam nysanǵa jóndeý jumystary júrgizildi. Sonymen qatar, jalpy somasy 261 mlrd teńgege medıtsınalyq qural-jabdyqtar satyp alyndy. Alaıda, ǵımarattardyń tozýynyń joǵary deńgeıde bolýy ózekti máselelerdiń biri bolyp qalýda», - dedi mınıstr.
Onyń dereginshe, jalpy 102 000 tósek qoryndaǵy eresekterge arnalǵan 11 000 tósek-orynnyń tıimsiz paıdalanýy anyqtalyp otyr. Nátıjesinde óńirler arasynda tósek-oryndarymen qamtamasyz etý kórsetkishi boıynsha aıyrmashylyq baıqalýda. Buǵan qosa, 6 óńirde balalar beıinderiniń tósek-oryndary artyq júktememen jumys jasap, saldarynan 1 200 tósek-oryndarynyń, onyń ishinde júkti áıelder men bosanǵan áıelderge arnalǵan tósek oryndarynyń tapshylyǵy baıqalady. Osy jyldyń basynda bul tapshylyq 2 myńnan astamdy qurady.
«Sondyqtan, densaýlyq saqtaý ınfraqurylymy normatıvterge sáıkestendirilip, tósek qory qaıta qaralatyn bolady. Osyǵan baılanysty, mınıstrlik tarapynan 10 000 adamǵa shaqqandaǵy eseppen halyqtyń suranysyna sáıkes óńirler boıynsha tósek beıinderi bólinisinde «statsıonarlyq kómek kórsetý boıynsha qajettilik normatıvin» bekitti. Sonymen qatar ár aýrýhananyń 1 tósek-orynǵa shaqqandaǵy alańdarynyń kólemderi árkelki jáne tıisti talap kórsetkishterinen artyq. Tósek qoryn utymdy paıdalaný jumystaryn júrgizý úshin tıisti normatıvtik aktiler bekitý arqyly halyqtyń suranysy boıynsha densaýlyq saqtaý ınfraqurylym júıesi qaıta sáıkestendiriledi. Sonymen qatar halyq sanynyń ósýine baılanysty ambýlatorııalyq-emhanalyq uıymdardyń qýattylyǵynyń jetispeýshiligi anyqtalyp otyr», - dedi Aqmaral Álnazarova.
