Densaýlyq saqtaý mınıstrliginiń jańa basshysy qaı problemaǵa birinshi kezekte nazar aýdarady

ASTANA. KAZINFORM – Jańadan Densaýlyq saqtaý mınıstri bolyp taǵaıyndalǵan Aqmaral Álnazarova vedomstvoda qaı máselelerge birinshi kezekte nazar aýdaratynyn aıtty.

«Qazir qaralýy tıis biraz másele bar. Osyǵan deıin biz Senat komıtetinde transplantologııa problemalaryn kótergen edik. Sondyqtan bul saladaǵy máseleni shuǵyl sheshý kerek. Sebebi 4 myńǵa jýyq naýqas organ almastyrýdy kútip otyr. Elimizde aǵza donorlyǵy tıisti deńgeıge jete almaı otyr. Ekinshi jaǵynan medıtsınalyq-sanıtarlyq alǵashqy kómekti kúsheıtý eskerilgen. Bul baǵyt neǵurlym kúshti bolsa, aýrýshańdyq pen ólim-jitim azaıady. Sondyqtan halyqtyń densaýlyǵyn saqtaýǵa baǵyttalǵan barlyq profılaktıkalyq is-sharalar medıtsınalyq-sanıtarlyq alǵashqy kómek deńgeıinde júzege asyrylady», - dedi A. Álnazarova Senatta tilshiler suraǵyna jaýap bere otyryp.

Onyń aıtýynsha, qazir aýyldaǵy densaýlyq saqtaý salasyn jańǵyrtý máselesi bar.

«Bul baǵytta Memleket basshysy tapsyrma berdi. Búgin osy máseleni sheshýge qatysty birneshe kezdesý josparlanǵan», - dedi mınıstr.

Budan buryn habarlanǵandaı, Aqmaral Álnazarova Mindetti áleýmettik medıtsınalyq saqtandyrý júıesin toqtatý josparda joq ekenin aıtty.

Munymen qosa ol elimizde ólimnen keıingi mindetti donorlyqty engizý múmkindigine qatysty pikir bildirdi.