Densaýlyq saqtaý mınıstrliginiń qurylymyna ózgeris engizildi
ASTANA. KAZINFORM - Qazaqstan Úkimeti Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetin qaıta qurdy. Tıisti qaýly 2026 jylǵy 3 tamyzda qabyldandy.
Qujatqa sáıkes, Medıtsınalyq jáne farmatsevtıkalyq baqylaý komıteti eki derbes vedomstvoǵa — Medıtsınalyq baqylaý komıteti men Farmatsııa komıtetine bolyp ekige bólindi.
Burynǵy komıtettiń aýmaqtyq bólimsheleri de qaıta uıymdastyryldy. Endi olar Medıtsınalyq baqylaý komıteti men Farmatsııa komıtetiniń aýmaqtyq bólimsheleri retinde jumys isteıdi.
Osyǵan baılanysty Densaýlyq saqtaý mınıstrligi týraly erejege ózgerister engizildi. Endi mınıstrliktiń qurylymyna úsh komıtet kiredi:
— Sanıtarııalyq-epıdemıologııalyq baqylaý komıteti;
— Medıtsınalyq baqylaý komıteti;
— Farmatsııa komıteti.
Sonymen qatar Densaýlyq saqtaý mınıstrliginiń qaramaǵyndaǵy uıymdardyń tizbesi jańartyldy. Atap aıtqanda, Medıtsınalyq baqylaý komıtetiniń aýmaqtyq bólimsheleriniń, sondaı-aq Farmatsııa komıtetine qarasty memlekettik kásiporyn men aýmaqtyq bólimshelerdiń tizbesi bekitildi.
Qaýly 2026 jylǵy 3 tamyzdan bastap qoldanysqa engizildi.
Aıta keteıik, buǵan deıin Qazaqstanda ókpe obyryn erte anyqtaýǵa arnalǵan jańa skrınıng baǵdarlamasy iske qosylǵan edi. Densaýlyq saqtaý mınıstrligi oǵan qatysatyn azamattardyń sanatyn bekitkeni habarlandy.
