Densaýlyq saqtaý mınıstrligi: jyl saıyn 80 myń patsıent donorlyq qan alady
ASTANA. KAZINFORM – Donorlyq qan medıtsınalyq resýrs qana emes, myńdaǵan adam úshin ómir súrýdiń naqty múmkindigi. Qazaqstanda jyl saıyn 80 myńnan astam patsıentke qan quıý júrgiziledi, onsyz olardyń saýyǵýy múmkin bolmas edi.
Densaýlyq saqtaý mınıstrliginiń málimetinshe, 2025 jyly elimizdiń qan qyzmeti 250 myńnan astam donatsııany qamtamasyz etti. Kún saıyn respýblıka boıynsha qan ortalyqtaryna 1000-ǵa deıin erikti donor kelip, qoǵamdaǵy áleýmettik jaýapkershiliktiń joǵary deńgeıin kórsetip otyr.
- Joǵary tehnologııalyq medıtsınalyq kómekti damytý da erekshe mańyzǵa ıe. 2025 jyly Qazaqstanda 168 gemopoezdik diń jasýshalaryn transplantatsııalaý júrgizilip, aǵzalardy transplantatsııalaý úshin 10 myńnan astam ımmýnogenetıkalyq zertteý jasaldy, - deıdi Transfýzıologııa ǵylymı-óndiristik ortalyǵynyń basqarma tóraǵasy Sanııa Abdrahmanova.
Aıta keteıik, elde 4 506 adam donorlyq aǵza kezeginde tur.