Densaýlyq saqtaý mınıstrligi telemedıtsınalyq qyzmetterdi damytýǵa jańa standarttar engizdi
ASTANA. KAZINFORM — Qazaqstan Respýblıkasy Densaýlyq saqtaý mınıstrligi «Densaýlyq saqtaý uıymdaryn medıtsınalyq buıymdarmen jaraqtandyrýdyń eń tómengi standarttaryn bekitý týraly» №167 buıryqqa ózgerister men tolyqtyrýlar engizdi. Bul ózgerister qashyqtan medıtsınalyq qyzmetterdi damytý qajettiligin eskere otyryp jasaldy.
Jańa qujat zamanaýı tehnologııalardy qoldaný arqyly, ásirese aýyldyq jáne shalǵaı aımaqtarda medıtsınalyq kómektiń qoljetimdiligin arttyrýǵa baǵyttalǵan. Jańartylǵan standarttar telemedıtsınalyq ózara árekettestikti damytýǵa jáne medıtsınalyq qyzmet kórsetý úderisterin tsıfrlandyrýǵa arnalǵan medıtsınalyq uıymdardy jaraqtandyrýdyń biryńǵaı talaptaryn belgileıdi.
Qujatta medıtsınalyq derekterdi tsıfrlyq túrde berý jáne medıtsınalyq aqparattyq júıelermen ıntegratsııalaý múmkindigin qamtamasyz etetin portatıvti medıtsınalyq jabdyqtardyń eń tómengi tizbesi bekitildi. Bul talaptar negizinen aýdandyq deńgeıden tómen ornalasqan medıtsınalyq-sanıtarııalyq alǵashqy kómek uıymdaryna qatysty.
Sonymen qatar bilim berý uıymdary janyndaǵy medıtsınalyq kabınetterge de arnaıy talaptar qoıyldy. Olarǵa balalarǵa profılaktıkalyq tekserýler júrgizýge arnalǵan jabdyqtar men beıindi mamandardyń nátıjelerdi qashyqtan taldaý múmkindigi kiredi.
Qylmystyq-atqarý júıesi mekemeleri úshin de arnaıy medıtsınalyq jabdyqtaý standarty engizildi. Bul sanattaǵy azamattarǵa medıtsınalyq kómekke teń qoljetimdilikti qamtamasyz etýge baǵyttalǵan.
Qujatta jabdyqtardyń tizimimen qatar olardyń fýnktsıonaldyq sıpattamalaryna qoıylatyn talaptar da anyqtaldy. Medıtsınalyq derekterdi tsıfrlyq túrde berý, saqtaý jáne aqparattyq júıelerge ıntegratsııalaý mindettiligi qarastyrylǵan, bul medıtsınalyq kómektiń úzdiksizdigin qamtamasyz etedi.
Atalǵan normalardy engizý telemedıtsınalyq qyzmetterdiń qamtý aıasyn keńeıtip, bastapqy deńgeıdegi dıagnostıkanyń tıimdiligin arttyrýǵa, medıtsına qyzmetkerleriniń júktemesin azaıtýǵa jáne patsıentter aǵynyn tıimdi bólý arqyly medıtsınalyq kómekke kútý ýaqytyn qysqartýǵa múmkindik beredi.
Qazirgi ýaqytta telemedıtsına patsıentterdiń iri medıtsınalyq ortalyqtarǵa barý qajettiligin azaıtatyn tolyqqandy densaýlyq saqtaý quraly retinde qoldanylady. Eldegi telemedıtsınalyq jeli 2 491 medıtsınalyq pýnktti, 784 feldsherlik-akýsherlik pýnktti, 1 165 dárigerlik ambýlatorııany jáne 844 mobıldi brıgadany qamtıdy.
2025 jyly 3,87 mıllıon telemedıtsınalyq qyzmet kórsetildi, bul 2024 jylmen salystyrǵanda 19%-ǵa kóp. Qazirgi tańda patsıentterge qashyqtan medıtsınalyq qyzmettiń 118 túri qoljetimdi.
Densaýlyq saqtaý mınıstrliginiń málimeti boıynsha, buıryqtyń qabyldanýy telemedıtsınany damytý jáne densaýlyq saqtaý júıesiniń turaqty tsıfrlyq ınfraqurylymyn qalyptastyrýdaǵy mańyzdy qadam sanalady.
Buǵan deıin habarlaǵanymyzdaı, 2022 jyldan bastap oqýǵa túsken medıtsına mamandary jańa júıe boıynsha jumys isteıdi.
