Densaýlyq saqtaý mınıstrligi respýblıkalyq psıhıatrııalyq aýrýhanaǵa tekserý júrgizedi
ASTANA. KAZINFORM — Densaýlyq saqtaý mınıstri Jiti baqylanatyn mamandandyrylǵan úlgidegi respýblıkalyq psıhıatrııalyq aýrýhananyń qyzmetin tekserýdi tapsyrdy.
Buǵan deıin buqaralyq aqparat quraldary men áleýmettik jelilerde atalǵan mekemedegi patsıentterdiń jaǵdaıyna qatysty shaǵymdar taraǵan edi.
Mınıstrliktiń tapsyrmasymen Medıtsınalyq jáne farmatsevtıkalyq baqylaý komıteti aýrýhana jumysyna keshendi tekserý bastaıdy. Mamandar medıtsınalyq qujattardy, emdeý protsesiniń uıymdastyrylýyn, patsıentterdiń ustalýy jaǵdaılaryn, laýazymdy tulǵalardyń áreketterin jáne azamattardyń quqyqtarynyń saqtalýyn qaraıdy.
Tekserýge prokýratýra organdary men Adam quqyqtary jónindegi ýákil sııaqty ýákiletti memlekettik organdar da qatysady.
Vedomstvo tekserý qorytyndysy boıynsha anyqtalǵan faktilerge quqyqtyq baǵa beriletinin málimdedi. Eger zań buzýshylyqtar anyqtalsa, kináli tulǵalar zańnamaǵa sáıkes jaýapkershilikke tartylady.
Mınıstrlik bul mekeme eldegi osy baǵyttaǵy jalǵyz mamandandyrylǵan medıtsınalyq uıym ekenin atap ótti. Munda sot sheshimi negizinde medıtsınalyq sıpattaǵy májbúrleý sharalary qoldanylǵan adamdar em qabyldaıdy.
Aýrýhanadaǵy patsıentterdiń 80 paıyzdan astamy adamǵa qarsy aýyr jáne asa aýyr qylmys jasaǵany aıtyldy. Mekemede erekshe emdeý-qorǵaý rejımi qoldanylady. Ol patsıentterdiń, medıtsına qyzmetkerleriniń jáne qoǵam qaýipsizdigin qamtamasyz etýge, sondaı-aq emdeý men ońaltý jumystaryn júrgizýge baǵyttalǵan.
Eske salaıyq, buǵan deıin Densaýlyq saqtaý mınıstri 15 tamyzǵa deıin elimizdegi bosandyrý qyzmetin kórsetetin barlyq 69 medıtsınalyq uıymda aýqymdy tekserý júrgizýdi tapsyrǵan edi.
