Densaýlyq saqtaý mınıstrligi eldegi pedıatrııalyq qyzmetti kúsheıtip jatyr
ASTANA. KAZINFORM — Balalardy keshendi medıtsınalyq súıemeldeýdi qamtamasyz etý maqsatynda sońǵy bir jylda emhanalarda 366 pedıatrııalyq bólimshe jáne shamamen sonsha Damý jáne erte aralasý ortalyǵy ashyldy, dep habarlaıdy DSM baspasóz qyzmeti.
Pedıatrııalyq bólimshelerdi qurý:
• balalardyń densaýlyǵyn týǵan sátinen bastap júıeli baqylaýdy qamtamasyz etýge;
• damý buzylystaryn erte anyqtaýdy kúsheıtýge;
• mýltıdıstsıplınarlyq tásildi engizýge;
• mamandandyrylǵan kómekti otbasylardyń turǵylyqty jerine jaqyndatýǵa múmkindik beredi.
Pedıatrııalyq bólimshelerdiń quramyna:
• pedıatr dárigerler kabınetteri;
• Damý jáne erte aralasý ortalyqtary (DEAO), onyń ishinde:
• patronaj qyzmetiniń dáriger-sýpervızory kabıneti;
• patronaj meıirgerler kabınetteri;
• bala damýy jónindegi mamandar;
• tamaqtaný boıynsha resýrstyq ortalyq;
• dybys oqshaýlaýy bar aýdıologııalyq skrınıng kabıneti;
• egý kabıneti;
• mektep medıtsınasy kabıneti kiredi.
Eger balanyń damý erekshelikteri anyqtalsa, ol Damý jáne erte aralasý ortalyǵyna jiberiledi. Munda balany mýltıdıstsıplınarlyq komanda súıemeldeıdi: pedıatr, patronaj meıirgeri, reabılıtolog, logoped, psıholog jáne basqa da mamandar.
— Bir jyldyń ishinde ortalyqtarda 72 myńnan astam balaǵa konsýltatsııa berildi, al damý buzylystaryn anyqtaý kórsetkishi 21,5%-ǵa artty. Osylaısha, júıe medıtsınalyq kómektiń deńgeılerin bólý qaǵıdatyna negizdelip qurylǵan, munda jalpy praktıka dárigeri (JPD) alǵashqy baılanys jáne úılestirý fýnktsııasyn atqarady, al qajet bolǵan jaǵdaıda mamandandyrylǵan pedıatrııalyq kómek qosylady, — delingen habarlamada.
Mundaı tásil kóptegen balalar úshin medıtsınalyq kómektiń qoljetimdiligin qamtamasyz etip, sonymen birge kúrdeli klınıkalyq jaǵdaılarda mamandandyrylǵan kómek alý múmkindigin saqtaýǵa múmkindik beredi.
Balany qarap, oǵan em-dom taǵaıyndaıtyn pedıatr dárigerdiń qabyldaýy ádette qymbat bolyp keledi. Osy rette Kazinform agenttiginiń tilshisi qalalardaǵy qabyldaý qyzmetiniń baǵasyn salystyrdy.
