Densaýlyq saqtaý mınıstrligi oblystyq aýrýhanalardy jańartý josparyn usyndy
ASTANA. KAZINFORM — 2026 jyldan bastap Qazaqstanda mamandandyrylǵan medıtsınalyq kómektiń qoljetimdiligi men sapasyn arttyrý maqsatynda oblystyq statsıonarlarda beıindi bólimsheler barlyq jerde ashylady. Bul týraly DSM baspasóz qyzmeti habarlady.
Búgin Densaýlyq saqtaý mınıstrliginde oblystyq aýrýhanalardy aýqymdy jańartý máselesi qaraldy. 2026 jyldan bastap Qazaqstanda mamandandyrylǵan medıtsınalyq kómektiń qoljetimdiligi men sapasyn arttyrý maqsatynda oblystyq statsıonarlarda beıindi bólimsheler ashylady.
— 2026-2028 jyldardyń ishinde elimizdiń 17 óńirinde barynsha talap etiletin kardıologııa, gastroenterologııa, pýlmonologııa, endokrınologııa, revmatologııa jáne gematologııa sııaqty baǵyttar boıynsha kómek kórsetýge baǵdarlanǵan 48 jańa beıindi bólimshe qurylady.
Barlyǵy 906, onyń 400-ge jýyǵy balalarǵa arnalǵan tósek ashý josparlanyp otyr, bul eresekter men balalar úshin mamandandyrylǵan kómekke qoljetimdilikti edáýir keńeıtýge múmkindik beredi, — delingen DSM habarlamasynda.
2026 jyly mamandandyrylǵan medıtsınalyq kómekke qajettiligi joǵary óńirlerde Ulytaý, Qyzylorda, Qostanaı jáne Jetisý oblystarynda 25 beıindi bólimshe jumysyn bastaý josparlanyp otyr.
Sonymen qatar Densaýlyq saqtaý mınıstrligi beıindi qyzmetterdiń qarjylyq turaqtylyǵyn nyǵaıtý jóninde sharalar qabyldaýda. Bıyl medıtsınalyq kómek kórsetý tarıfterin:
* pýlmonologııa boıynsha — 75%-ǵa;
* revmatologııa boıynsha — 24%-ǵa kóterý týraly sheshim qabyldandy.
2026 jylǵy 1 qańtardan bastap taǵy kardıologııa, nefrologııa, gastroenterologııa, endokrınologııa sııaqty tórt negizgi eresekter men balalar beıini boıynsha tarıfterdi shamamen 50%-ǵa kóterý josparlanyp otyr.
Osy sharalardy iske asyrý:
* mamandandyrylǵan medıtsınalyq kómektiń sapasyn arttyrýǵa;
* beıindi bólimshelerdi qarjylandyrýdy jaqsartýǵa;
* medıtsına qyzmetkerleriniń ýájdemesin kúsheıtýge;
* jalpy oblystyq statsıonarlar deńgeıinde terapııalyq býyndy nyǵaıtýǵa múmkindik berdi.
2026 jyly statsıonarlyq medıtsınalyq kómekti qarjylandyrý 8%-ǵa ulǵaıtylady jáne shamamen 700 mlrd teńge.
Osylaısha, eresekter men balalarǵa arnalǵan oblystyq statsıonarlardy jańartý sheńberinde halyqtyń naqty qajettilikterine baǵdarlanǵan óńirlerde ýaqtyly, sapaly jáne qoljetimdi medıtsınalyq kómek alý úshin jaǵdaılar jasalady.
Aıta ketelik shetelden jetkizilgen dári-dármek tyńǵylyqty tekseriletini týraly jazǵan edik.