Densaýlyq saqtaý mınıstrligi nege «SQ Farmatsııadan» bas tarta almaıdy
ASTANA. KAZINFORM – QR Densaýlyq saqtaý mınıstri Aqmaral Álnazarova «SQ-Farmatsııa» JShS qyzmetindegi sybaılas jemqorlyq táýekelderi týraly syn-pikirlerge jaýap berdi.
«Munda «SQ-Farmatsııa» ǵana emes, Dárilik zattardy saraptaý ulttyq ortalyǵy, mınıstrliktiń departamenti men farmatsevtıkalyq baqylaý komıteti tekserýden ótti. Shynynda da, biz bul eskertýler men buzýshylyqtarmen kelisemiz. Kadrlyq aýys-túıis jasaldy, bıyl aıtylǵan buzýshylyqtardy eskere otyryp, basqa ádisnama boıynsha satyp alý júrgizýdi josparlap otyrmyz. Ol úshin normatıvtik-quqyqtyq baza qaıta qaralyp jatyr, satyp alý tártibin ózgertý úshin mınıstrliktiń buıryqtaryn tutastaı qaıta qaraý qajet», - dedi A. Álnazarova Úkimette ótken brıfıngide.
Sonymen birge mınıstr «SQ-Farmatsııa» jumysyn qaıta qaraý men túbegeıli jabý jóninde tilshiler suraǵyna jaýap berdi.
«Eger «SQ-Farmatsııadan» bas tartsaq, barlyq satyp alýdy jergilikti atqarýshy organdar júrgizedi. 2018 jylǵa deıin bizde bul tájirıbe boldy, jáne barlyq medıtsınalyq uıymdar óz betinshe satyp alǵanda birinshiden, dári-dármekterdi jetkizýde úzilister bolýy múmkin, ekinshiden, Biryńǵaı dıstrıbıýtor satyp alatyn kólemdi eskere otyryp, keı pozıtsııalarda bıýdjet qarajatyn aıtarlyqtaı únemdeýge múmkindik bar. «SQ-Farmatsııa» qurylǵan sátten bastap 250 mlrd teńgege jýyq bıýdjet qarajatyn únemdedi. Oǵan qosa, «SQ-Farmatsııa» statsıonarlar úshin de, ambýlatorııalyq dári-dármekpen qamtamasyz etýdi de satyp alýda. Jalpy «SQ-Farmatsııa» jumysyn túbegeıli qaıta qaraý kerek, munymen tolyq kelisemiz. Buzýshylyqtardyń bir bóligi quqyq qorǵaý organdaryna berildi. Odan bólek, jetildirý jáne jalpy ońtaılandyrý boıynsha jumys isteımiz. Bıýdjet qarajatynyń shyǵyny tıimdi, ashyq bolýy tıis», - dedi A. Álnazarova.
Eske sala ketsek, Sybaılas jemqorlyqqa qarsy qyzmet Densaýlyq saqtaý mınıstrligimen birlesip, aǵymdaǵy jyldyń 1-toqsanynda «SQ-Farmatsııa» JShS qyzmetindegi sybaılas jemqorlyq táýekelderine syrtqy taldaý júrgizdi.
Taldaý nátıjeleri kórsetkendeı, SQF-da halyqty dárilik zattarmen jáne medıtsınalyq buıymdarmen ýaqtyly jáne sapaly qamtamasyz etý, farmatsevtıka salasy men ónerkásipti damytý jónindegi mindetterdi iske asyrýǵa kedergi keltiretin eleýli sybaılas jemqorlyq táýekelderi bar.
