Densaýlyq saqtaý mınıstrligi qaraqurttyń qaýpi týraly eskertti

ASTANA. KAZINFORM – QR Densaýlyq saqtaý mınıstrligi órmekshilerdiń maýsymdyq belsendiligine baılanysty (shildeden qyrkúıekke deıin) qaraqurt shaǵýynyń aldyn alý sharalaryn eske salady.

Qaraqurttardyń jáne basqa da ýly órmekshilerdiń shaǵýyn boldyrmaý úshin kelesi 5 erejeni saqtaýdy usynamyz:

- Qorǵanys kıimin kıińiz: qaraqurt mekendeıtin jerlerde uzyn shalbar men jabyq aıaq kıim (janýarlardy ustaý oryndary jáne t.b.).
- Kıim men aıaq kıimdi kıer aldynda, ásirese syrtta bolǵannan keıin tekserińiz.
- Qorǵanys quraldaryn (ınsektıtsıdter) qoldanyńyz.
- Tazalyq saqtańyz: qoqystardy ýaqtyly tazalańyz, ýchaskeni jáne qosalqy ǵımarattardy únemi tekserip otyryńyz.
- Órmekshini qolyńyzben ustamańyz.

Qaraqurt shaqqannan keıingi belgiler: qaraqurt shaqqannan keıin 10-15 mınýttan keıin búkil denege taralatyn qatty, aıqyn aýyrsyný paıda bolady. Intoksıkatsııa belgileri joǵarylaıdy: júrek soǵysy, entigý, bas aýrýy, júrek aıný, qusý, bettiń qyzarýy, tersheńdik.

Qaraqurt shaǵyp alǵan jaǵdaıda dereý jaqyn jerdegi medıtsınalyq uıymǵa medıtsınalyq kómekke júginý qajet.

Búgingi tańda adamdardy qaraqurttyń shaǵý jaǵdaılary Shymkent qalasynda jáne Atyraý oblysynda tirkelgen, shaǵyp alǵan adamdar tıisti medıtsınalyq kómek aldy. Jergilikti atqarýshy organdar profılaktıkalyq dezınsektsııany uıymdastyrý jáne júrgizý jóninde sharalar qabyldaýda.

Anyqtama: qaraqurt – álemdegi eń qaýipti dep sanalatyn órmekshi. Qaraqurttyń ýy – toksalbýmın. Ol neırotoksıkalyq, lımfa júıesi arqyly tez taralady. Bul shyldyr jylannyń ýynan 15 ese ýly.

Osyǵan deıin Baıanaýyldaǵy týrıstik oryndarda qaraqurt qaptap ketkeni habarlandy.

Keıinirek Baıanaýylda qaraqurt qaptaýyna baılanysty tabıǵı sıpattaǵy tótenshe jaǵdaı jarııalanýy múmkin ekeni aıtyldy.

Sondaı-aq Atyraý oblysynda qaraqurt shaqqan 485 túıeniń toqsany ólgeni aıtyldy.