Densaýlyq saqtaý mınıstrligi kún ótýden saqtanýǵa shaqyrdy
ASTANA. KAZINFORM – Densaýlyq saqtaý mınıstrligi aptap ystyqta kún ótýdiń adam ómirine qaýip tóndiretinin eskertip, turǵyndardy saqtyq sharalaryn qatań saqtaýǵa shaqyrdy.
Vedomstvonyń málimetinshe, kún ótý – aǵzanyń qatty qyzyp ketýi saldarynan dene temperatýrasyn qalypty deńgeıde ustap turý qabileti buzylatyn qaýipti jaǵdaı.
– Ýaqtyly medıtsınalyq kómek kórsetilmese, kún ótý mıdyń, júrektiń, búırektiń jáne basqa da ómirlik mańyzdy aǵzalardyń zaqymdalýyna, al aýyr jaǵdaıda ólimge ákelýi múmkin, – dep eskertti mınıstrlik.
Mamandardyń aıtýynsha, kún ótýdiń negizgi belgilerine dene qyzýynyń kóterilýi, qatty álsizdik, bas aýrýy, bas aınalý, júrek aıný, sananyń shatasýy nemese esten taný jatady.
– Eger mundaı belgiler baıqalsa, dereý jedel járdem shaqyryp, zardap shekken adamdy salqyn jerge shyǵaryp, denesin salqyndatýdy bastaý qajet, – delingen habarlamada.
Mınıstrlik kúnniń eń ystyq ýaqytynda uzaq ýaqyt dalada bolmaýǵa, jetkilikti mólsherde sý ishýge, jeńil ári ashyq tústi kıim kııýge jáne bas kıim taǵýǵa keńes beredi.
Aıta keteıik, Shymkent pen Túrkistanda aptap ystyq jalǵasatyny habarlandy.
