Densaýlyq saqtaý mınıstrligi qosymsha medıtsınalyq bilim berý uıymdarynyń jańa tizbesin bekitti
ASTANA. KAZINFORM – Densaýlyq saqtaý mınıstrligi medıtsınalyq mamandyqtar boıynsha qosymsha bilim berý uıymdarynyń tizimin qalyptastyrý tártibin jańartty. Bul týraly Densaýlyq saqtaý mınıstrligi habarlady.
Jańa erejeler medıtsınalyq kadrlardy daıarlaý sapasyn jaqsartýǵa jáne bilim berý uıymdarynyń qyzmetin baqylaýdy kúsheıtýge baǵyttalǵan.
Endi ýákiletti organ qosymsha bilim berý uıymdarynyń tizimin eki baǵyt boıynsha bóledi: dárigerlerdi oqytatyn zańdy tulǵalar jáne orta medıtsınalyq personaldy daıarlaıtyn uıymdar.
– Tizimge engizý úshin uıymnyń qosymsha medıtsınalyq bilim berý baǵdarlamalaryn júzege asyrýǵa quqyq beretin resmı qujattar bolýy kerek. Jańa talaptar bilim berý ortalyqtarynyń ınfraqurylymy men resýrstyq qamtamasyz etilý standarttaryn qataıtady. Uıymdar mindetti akkredıtteýden ótip, bekitilgen oqý baǵdarlamalaryn usynýy jáne halyqaralyq aqparattyq júıelerge qol jetkizýi tıis.
Sonymen qatar uıymdarda bilim berý qyzmetine lıtsenzııa nemese ǵylymı uıym mártebesi bolýy, klınıkalyq baza nemese praktıkalyq daıyndyq júrgizýge akkredıttelgen medıtsınalyq uıymdarmen kelisim-shart bolýy talap etiledi. Zamanaýı sımýlıatsııalyq jabdyq, zerthanalyq baza, kompıýterlik tehnologııalar bolýy jáne memlekettik organdardyń biryńǵaı kólik júıesine qosylý da mindetti, - delingen habarlamada.
Mınıstrlik uıymdardyń qyzmetin, onyń ishinde kóshpeli tekserýler arqyly júıeli túrde baqylap, tizimdi únemi jańartyp otyrady.
Vedomstvo ókilderiniń aıtýynsha, materıaldyq-tehnıkalyq baza men klınıkalyq resýrstardyń naqty talaptarǵa saı bolýy tekseriledi. Bul talaptardy oryndamaıtyn uıymdardyń tizimde bolýyna jol berilmeıdi.
Jańa normalar bilim berý ortalyqtaryn irikteýdiń ashyq júıesin qalyptastyryp, medıtsına qyzmetkerleriniń biliktiligin arttyrý tek qajetti ǵylymı áleýeti, zamanaýı jabdyqtary jáne klınıkalyq bazasy bar uıymdarda júrgizilýin qamtamasyz etedi dep kútilip otyr.
Qabyldanǵan ózgerister densaýlyq saqtaý júıesiniń kadrlyq áleýetin arttyrýǵa jáne medıtsınalyq qyzmet sapasyn jaqsartýǵa baǵyttalǵan.
Budan buryn medıtsına qyzmetkerleriniń quqyǵy men qaýipsizdigi kúsheıtiletinin jazǵan edik.