Densaýlyq saqtaý mınıstrligi hımııalyq kastratsııany qoldaný tártibin ózgertýdi usynbaq

ASTANA. KAZINFORM – Densaýlyq saqtaý mınıstrligi pedofılııa úshin sottalǵandarǵa qatysty hımııalyq kastratsııany qoldaný erejelerin ózgertýdi josparlap otyr. Bul másele BIZDIÑ ORTA podkasynyń jańa shyǵarylymynda talqylandy.

Mamandardyń aıtýynsha, qazirgi tańda preparattar úkim shyqqan boıda qoldanylady. Alaıda olardyń baǵasy qymbat ári bıýdjet qarajatynyń tıimsiz jumsalýyna ákeledi. Osyǵan baılanysty jańa usynys daıyndaldy: sottalǵandarǵa túrmeden bosatylýyna bir jyl qalǵanda psıhıatrııalyq saraptama júrgiziledi. Eger retsıdıv qaýpi rastalsa, hımııalyq kastratsııa bosatylýyna alty aı qalǵanda taǵaıyndalady.

Psıhıatr, patsıentterdi qoldaý jáne ishki saraptama qyzmetiniń jetekshisi Tamara Nasyrovanyń aıtýynsha, mundaı tásildiń birneshe artyqshylyǵy bar.

– Preparattyń tıimdiligi shamamen 20-50% deńgeıinde, al 15-18% jaǵdaıda rezıstenttik baıqalady. Inektsııany bosatylýǵa alty aı qalǵanda engizýdiń sebebi – terapııalyq áserdiń qanshalyqty jyldam qalyptasatynyn baqylaýǵa múmkindik beredi. Sonymen qatar qaýipsizdik profılin, ıaǵnı dáriniń aǵzaǵa áserin qadaǵalaý mańyzdy, – dedi ol.

Alaıda Májilis depýtaty Magerram Magerramov bul usynysty tıimsiz dep sanaıdy.

– Biz tym gýmanıstik kózqaras tanytyp otyrmyz dep oılaımyn. Balalarǵa qarsy qylmystarǵa áldeqaıda qatań jaza qoldaný qajet. Eki jol bar: medıtsınalyq qaýymdastyq aıtqandaı, olardy ómir boıy túrmede ustaý nemese mundaı qylmystardy terrorıstik aktilerge teńestirý. Inektsııa salý olardyń sanasyndaǵy máseleni sheshedi dep oılamaımyn, – dedi depýtat.

Qazirgi tańda Densaýlyq saqtaý mınıstrliginiń usynysy talqylaý kezeńinde. Bıylǵy kúzde bul túzetýler Májiliske qaraýǵa engizilýi múmkin.

Aıta keteıik, Úkimet Densaýlyq saqtaý mınıstrliginiń quzyretin keńeıtti.