Densaýlyq saqtaý mınıstrligi eldegi JRVI jáne tumaý statıstıkasyn jarııalady

ASTANA. KAZINFORM — QR DSM Sanıtarııalyq-epıdemıologııalyq baqylaý komıteti eldegi JRVI jáne tumaýǵa qatysty jaǵdaıdy baıandady.

Densaýlyq saqtaý mınıstrligi apta saıyn tumaý men jedel respıratorlyq vırýstyq ınfektsııalar (JRVI) boıynsha epıdemıologııalyq ahýalǵa monıtorıng júrgizedi. Jyl saıyn respýblıkada 4-5 mıllıon JRVI jáne 2 myńnan astam tumaý jaǵdaıy tirkeledi.

Ádette epıdemologııalyq aýrý órshıtin kezeń 1 qazannan 1 mamyrǵa deıin sozylady.

— Qazirgi epıdemıologııalyq maýsym bastalǵaly respýblıka boıynsha 4 065 216 JRVI jaǵdaıy tirkeldi, bul ótken epıdmaýsymnyń sáıkes kezeńimen salystyrǵanda syrqattanýshylyqtyń 15%-ǵa tómendegenin kórsetedi. Bul aralyqta zerthanalyq túrde rastalǵan 3570 tumaý jaǵdaıy tirkeldi (A (H1N1) tumaýy — 52% (1855 jaǵdaı), A (H3N2) — 3,6% (130 jaǵdaı), V tumaýy — 44,4% (1585 jaǵdaı), — dep jaýap berdi komıtet Kazinform agenttiginiń saýalyna.

Respýblıka boıynsha tumaýǵa qarsy 2 329 912 adam ekpe alǵan, bul Qazaqstan halqynyń 11,6%-yn quraıdy. Al Dúnıejúzilik densaýlyq saqtaý uıymynyń usynymy boıynsha bul kórsetkish keminde 10% bolýy tıis.

Al koronavırýs boıynsha 2025 jyldyń basynan beri elimizde 230 juqtyrý jaǵdaıy tirkelgen, ólim-jitim joq. Ótken jyldyń osy kezeńimen salystyrǵanda syrqattanýshylyq deńgeıi 5 esege tómendegen (2024 jyldyń osy kezeńinde — 1168 jaǵdaı tirkelgen edi). Qazirgi ýaqytta statsıonarlyq emdeýde jatqan naýqastar joq.