Densaýlyq saqtaý mınıstrligi BQO-daǵy medıtsınalyq qaldyqtarǵa qatysty málimdeme jasady
ORAL. KAZINFORM — Qazaqstan Respýblıkasy Densaýlyq saqtaý mınıstrligi Batys Qazaqstan oblysynda anyqtalǵan medıtsınalyq qaldyqtardy zańsyz tógý faktisine qatysty tergeý jumystaryn erekshe baqylaýda ustap otyr.
Zań buzýshylyq faktisi anyqtalǵannan keıin birden sanıtarııalyq-epıdemıologııalyq qyzmet, quqyq qorǵaý organdary jáne ekologııalyq bólimshelerdiń qatysýymen keshendi tekserý is-sharalary uıymdastyryldy.
Jedel sharalar sheńberinde polıtsııa qyzmetkerleriniń qatysýymen «Kemel» JK ókilderi jalpy kólemi 144 kılogramdy quraıtyn anyqtalǵan medıtsınalyq qaldyqtardy jınaýdy júzege asyrdy. Barlyq materıal tárkilenip, kásiporyn aýmaǵyna ornalastyryldy jáne zattaı dáleldeme retinde mórlendi.
Qorshaǵan ortaǵa jáne sanıtarııalyq-epıdemıologııalyq jaǵdaıǵa yqtımal áserin baǵalaý maqsatynda mamandar topyraqtan synamalar aldy. Zerthanalyq zertteýler mıkrobıologııalyq jáne sanıtarııalyq-hımııalyq kórsetkishter boıynsha júrgizilip jatyr.
Sonymen qatar anyqtalǵan zań buzýshylyq orny men oǵan irgeles aýmaqta tolyq kólemde dezınfektsııalyq jumystar júrgizildi.
Densaýlyq saqtaý mınıstrliginde medıtsınalyq qaldyqtarmen durys jumys istemeý faktileri sanıtarııalyq-epıdemıologııalyq talaptardy óreskel buzý retinde qarastyrylatyny jáne halyq densaýlyǵyna áleýetti qaýip tóndiretini atap ótildi.
Tekserý materıaldary quqyqtyq baǵa berý úshin ýákiletti organdarǵa jiberildi. Tergeý qorytyndysy boıynsha kináli tulǵalar Qazaqstan Respýblıkasynyń zańnamasyna sáıkes jaýapkershilikke tartylady.
Zerthanalyq zertteýlerdiń aldyn ala nátıjeleri 3–7 kún ishinde belgili bolady dep kútilip otyr.
Eske sala keteıik, buǵan deıin BQO-da tabylǵan medıtsınalyq qaldyqtardyń jaı-japsary belgili bolǵanyn jazǵan edik.
