Densaýlyq saqtaý mınıstrligi bedeýliktiń negizgi sebepterin atady

ASTANA. KAZINFORM – Densaýlyq saqtaý mınıstrligi qazaqstandyqtar arasyndaǵy bedeýliktiń negizgi sebepterin atady.

Densaýlyq saqtaý mınıstrliginiń Ana men bala densaýlyǵyn qorǵaý departamentiniń dırektory Shákızat Halyqova bedeýliktiń áleýmettik-medıtsınalyq problema ekenin atap ótti.

«Negizgi sebepter jynystyq jolmen beriletin ınfektsııalar, erte jynystyq belsendilik jáne túsik jasatý bolyp tabylady. Qazir jastardyń birneshe seriktesi bar jáne olar jynystyq jolmen beriletin juqpaly aýrýlardan qorǵanbaıdy, sonyń saldarynan jatyr tútikteriniń ótkizgishtigi buzylyp, bedeýlikke ákep soǵady», – dedi Shákızat Halyqova.

Esterińizge salsaq, buǵan deıin uıaly telefondy jıi paıdalaný er adamnyń spermatozoıd sanyna áser etýi múmkin ekenin jazǵan edik.