Densaýlyq saqtaý mınıstrligi balalarǵa arnalǵan fastfýd jarnamasyn shekteýdi usyndy
ASTANA. KAZINFORM - Densaýlyq saqtaý mınıstrligi quramynda qant, tuz, qanyqqan jáne transmaılar mólsheri joǵary azyq-túlik ónimderiniń, onyń ishinde fastfýd pen tátti sýsyndardyń balalarǵa baǵyttalǵan jarnamasyn shekteý boıynsha zańnamalyq usynystar ázirledi.
Aıta keteıik, buǵan deıin Memleket basshysy Úkimetke fastfýdtyń agressıvti jarnamasy máselesin qarastyrýdy tapsyrǵan bolatyn. Ol mundaı jarnamanyń zııandy ádetterdiń qalyptasýyna yqpal etetinin, densaýlyq saqtaý júıesine túsetin júktemeni arttyratynyn jáne eldiń eńbek áleýetine keri áser etetinin atap ótti.
Zańnamalyq bastamalardyń negizgi maqsaty – balalardyń taǵamdyq talǵamyna marketıngtik yqpaldy azaıtý jáne erte jastan bastap durys tamaqtaný ádetterin qalyptastyrýǵa yqpal etý.
Azyq-túlik ónimderiniń jarnamasy balalar men jasóspirimderge aıtarlyqtaı áser etedi. Olar jarqyn qaptamaǵa, áleýmettik jeliler men blogerler arqyly jarnamalaýǵa jáne basqa da marketıngtik quraldarǵa kóbirek beıim keledi.
«Mınıstrlik quramynda tuz, qant, qanyqqan jáne transmaılar mólsheri joǵary tamaq ónimderiniń jarnamasyn tele- jáne radıolarda, áleýmettik jelilerde, syrtqy jarnama quraldarynda shekteý boıynsha zańnamaǵa ózgerister engizý jóninde usynystar ázirledi. Atalǵan usynystardy iske asyrý maqsatynda osy shekteýlerdiń retteýshilik áserin taldaýdy ázirleý jumystary bastaldy», – dedi QR Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Gúlnar Sársembaeva apparattyq keńeste sóılegen sózinde.
Zertteý derekterine sáıkes, 6–9 jas aralyǵyndaǵy balalardyń 23%-ynda artyq dene salmaǵy bar, al 6%-y semizdikke shaldyqqan. Sonymen qatar jasóspirimderdiń 17,5%-y energetıkalyq sýsyndardy apta saıyn tutynady.
Zańnamaǵa ózgerister engizý jónindegi usynystar halyqaralyq tájirıbe men Dúnıejúzilik densaýlyq saqtaý uıymynyń usynymdaryn eskere otyryp ázirlendi.
Qazaqstanda durys tamaqtaný mádenıetin qalyptastyrýǵa baǵyttalǵan birqatar shara qazirdiń ózinde júzege asyrylýda. 21 jasqa tolmaǵan adamdarǵa energetıkalyq sýsyndardy satýǵa tyıym salynǵan. 2025 jylǵy qyrkúıekten bastap bilim berý uıymdarynda jańa tamaqtaný standarty qoldanysqa engizildi. Ol ratsıondaǵy qant pen tuz mólsherin azaıtýdy, sondaı-aq kókónister, jemister jáne sút ónimderiniń úlesin arttyrýdy kózdeıdi.
Óńirlerge profılaktıkalyq jumysty kúsheıtý jáne balalar men ata-analarǵa durys tamaqtaný qaǵıdalary týraly aqparat berýdi arttyrý tapsyryldy.
Usynylyp otyrǵan sharalar jekelegen ónimderge tyıym salýǵa emes, olardyń balalar arasynda nasıhattalýyn shekteýge jáne durys tańdaý jasaýǵa qolaıly orta qalyptastyrýǵa baǵyttalǵan.
Osyǵan deıin Qazaqstan óńirlerinde fastfýd baǵasy qalaı ózgergeni týral statıstıkalyq málimetterdi jarııaladyq.
