Densaýlyq saqtaý mınıstrligi balalar lagerlerin «kenetten tekserý» formatyna kóshedi
ASTANA. KAZINFORM - Qazaqstan Respýblıkasy Densaýlyq saqtaý mınıstrligi jazǵy saýyqtyrý maýsymy qarsańynda balalardyń qala syrtyndaǵy lagerlerindegi sanıtarııalyq-epıdemıologııalyq jaǵdaıǵa baqylaýdy kúsheıtpek.
Mınıstrliktiń baspasóz qyzmetiniń habarlaýynsha, is-sharalar kesheni balalardyń qaýipsiz demalýyn qamtamasyz etýge baǵyttalǵan. Negizgi talaptarǵa qorshalǵan aýmaqtyń bolýy, úzdiksiz sýmen jabdyqtaý, káriz júıesi, jaryqtandyrý jáne jeldetý kiredi.
Barlyq úı-jaılar taza jaǵdaıda ustalýy tıis, ruqsat etilgen dezınfektsııalyq quraldardy qoldana otyryp, kúndelikti tazalyq jumystary júrgizilýi qajet.
Lagerlerde sondaı-aq bes mezgil tamaqtaný uıymdastyrylyp, medıtsınalyq qyzmet kórsetilýi tıis.
Shomylatyn oryndarda sý aıdyndary men topyraqtan synamalar alynyp, gıgıenalyq normatıvterge sáıkestigi zerthanalyq tekserýden ótkiziledi. Maýsym boıy sý aıdyndary men basseınderdegi sýdyń jaı-kúıine turaqty monıtorıng júrgiziledi.
2026 jyldyń ekinshi jartyjyldyǵynda Mınıstrlik memlekettik bıýdjettiń esebinen qarjylandyrylatyn barlyq balalar saýyqtyrý uıymdaryn memlekettik baqylaýdyń erekshe tártibi sheńberinde tekseredi.
Alǵash ret bekitilgen tizimder boıynsha josparly tekserýler tetigi engiziledi, bul tizimder 10 mamyrǵa deıin Komıtettiń aýmaqtyq bólimsheleriniń ınternet-resýrstarynda jarııalanady.
Qosymsha túrde josparly tekserýler tizimine engizilmegen nysandarǵa baryp tekserý arqyly jańa baqylaý formaty engizildi.
-Bul rette tekserýler aldyn ala eskertýsiz júrgiziledi, bul lagerlerdiń naqty jaǵdaıyn obektıvti baǵalaýǵa jáne daıyndyqtaǵy formaldylyqty boldyrmaýǵa múmkindik beredi. Mınıstrlik lager ıelerine nysandardy aldyn ala daıyndaý, sanıtarııalyq-epıdemıologııalyq qorytyndy alý, personalǵa qoıylatyn talaptardy saqtaý jáne belgilengen syıymdylyqtan asyrmaý qajettigin eskertedi,-delingen habarlamada.
Sondaı-aq habarlamada ata-analarǵa sanıtarııalyq-epıdemıologııalyq qorytyndysy bar resmı tizimdegi lagerlerdi tańdaý, bala densaýlyǵyna nazar aýdarý jáne alyp júretin adamdardy múmkin bolatyn medıtsınalyq erekshelikter týraly habardar etý usynylatyny jazylǵan.
Barlyq zańbuzýshylyq faktileri boıynsha azamattar sanıtarııalyq-epıdemıologııalyq baqylaý komıtetiniń aýmaqtyq bólimshelerine júgine alady.
Mınıstrlik jazǵy demalys kezeńinde balalardyń qaýipsizdigi men densaýlyǵyn qamtamasyz etý erekshe baqylaýda ekenin atap ótedi.
Jergilikti atqarýshy organdardyń málimeti boıynsha, bıyl 199 lager, onyń ishinde 20-sy – jyl boıy, 179-y – maýsymdyq jumys isteıdi.
Osyǵan deıin Májilis depýtaty balalar lagerlerin lıtsenzııalaýdy jazǵa deıin tolyq engizý qajettigi týraly aıtqan edi.
