Densaýlyq saqtaý mınıstri júkti áıelder men balalarǵa qatysty tapsyrma berdi
ASTANA. KAZINFORM – Densaýlyq saqtaý mınıstri Aqmaral Álnazarova júkti áıelderge, jańa týǵan nárestelerge jáne bes jasqa deıingi balalarǵa medıtsınalyq baqylaý men kómek kórsetýdi kúsheıtýdi tapsyrdy.
Tıisti tapsyrmalar Densaýlyq saqtaý mınıstrliginde óńirlik densaýlyq saqtaý basqarmalary men respýblıkalyq medıtsınalyq ortalyqtar basshylarynyń qatysýymen ótken apparattyq keńeste berildi. Bul sharalar 2026–2030 jyldarǵa arnalǵan «Qazaqstan balalary» tujyrymdamasyn iske asyrý sheńberinde kózdelgen.
Bul qaýip tobyna jatatyn júkti áıelderdi jeke baqylaý, bosandyrý uıymdarynyń daıyndyǵyn qamtamasyz etý jáne balalarǵa shuǵyl medıtsınalyq kómek kórsetý sapasyn baqylaýdy kúsheıtý mindetterin qamtıdy.
-Árbir júkti áıel, ásirese joǵary qaýip tobyna jatatyn áıel turaqty medıtsınalyq baqylaýda bolýy tıis. Júktilikti qadaǵalap-qaraýdyń jeke josparyn aldyn ala aıqyndap, bosandyrý baǵytyn belgilep, jaýapty mamandardy bekitý qajet, – dep atap ótti Aqmaral Álnazarova.
Mınıstr júkti áıelderdi ýaqtyly emdeýge jatqyzýǵa jáne statsıonarlardyń shuǵyl akýsherlik-gınekologııalyq kómek kórsetýge, onyń ishinde demalys jáne mereke kúnderi daıyn bolýyna erekshe nazar aýdardy.
Óńirlik densaýlyq saqtaý basqarmalaryna júkti áıelderdi emdeýge jatqyzýdan negizsiz bas tartý jaǵdaılaryna jol bermeý jáne medıtsınalyq baqylaýdyń úzdiksizdigin qamtamasyz etý tapsyryldy.
- Júkti áıel medıtsınalyq uıymǵa júgingen kezde qajetti mamandardy tarta otyryp, medıtsınalyq kómek sol jerde uıymdastyrylýy tıis. Aýrýhanany áıeldiń ózi izdemeýi kerek, kerisinshe, densaýlyq saqtaý júıesi oǵan ýaqtyly kómek kórsetýdi qamtamasyz etýi qajet, – dedi mınıstr.
Bes jasqa deıingi balalarǵa jedel medıtsınalyq kómek kórsetý máselesine de erekshe nazar aýdaryldy. Jedel járdem shaqyrylǵan kezde balanyń jaǵdaıyn tolyq baǵalaý qajet. Kórsetilimder bolǵan jaǵdaıda balany qosymsha tekserý jáne emdeýge jatqyzý máselesin sheshý úshin statsıonarǵa jetkizý kerek.
Mınıstr jedel medıtsınalyq járdem qyzmetiniń tıisti jumys algorıtmderin qaıta qaraýdy, medıtsına qyzmetkerleriniń daıarlyǵyn kúsheıtýdi jáne balalardyń jaǵdaıynyń aýyrlyǵyn durys baǵalamaý jaǵdaılaryn boldyrmaýdy tapsyrdy.
Sonymen qatar perınataldyq ortalyqtardaǵy ınfektsııalyq baqylaý kúsheıtilip, patsıentterdi medıtsınalyq uıymdardyń arasynda baǵyttaý tártibi jetildiriledi jáne joǵary qaýip tobyndaǵy júkti áıelderge jedel medıtsınalyq baqylaý uıymdastyrylady.
Respýblıkalyq ǵylymı ortalyqtarǵa óńirlerge praktıkalyq qoldaý kórsetýdi kúsheıtý, jas akýsher-gınekologtar, neonatologtar men balalar mamandaryna tálimgerlik júıesin damytý tapsyryldy. Eki apta ishinde ortalyqtar medıtsına qyzmetkerleriniń biliktiligin arttyrý jóninde usynystar usynýy tıis.
Statsıonardan shyqqannan keıin ana men balaǵa medıtsınalyq kómek kórsetý máselesine de erekshe kóńil bólindi. Mınıstrlik patronajdyq barýlardyń sapasyn jáne perzenthanalar men emhanalar arasyndaǵy medıtsınalyq baqylaýdyń sabaqtastyǵyn qamtamasyz etýge baqylaýdy kúsheıtedi.
2026–2030 jyldarǵa arnalǵan «Qazaqstan balalary» tujyrymdamasy sheńberinde profılaktıkalyq kómekti keńeıtýge, medıtsınalyq ınfraqurylymdy damytýǵa jáne balalarǵa kórsetiletin mamandandyrylǵan kómektiń sapasyn arttyrýǵa baǵyttalǵan 30 is-sharany iske asyrý kózdelgen.
Aıta ketelik medıtsına salasynda shaǵym 44% kóbeıgeni týraly jazǵan edik.
