Densaýlyq saqtaý mınıstri qaıtys bolǵannan keıingi donorlyqqa kelisim berdi
ASTANA. KAZINFORM — Densaýlyq saqtaý mınıstri Aqmaral Álnazarova donorlyq jónindegi óz erkin kópshilikke jarııa etti.
— Búgin kópten beri qabyldaǵan — qaıtys bolǵannan keıingi donorlyqqa kelisim berý jónindegi óz erkimdi bildirýimdi tirkeý týraly sheshimimdi kópshiliktiń aldynda jarııalaǵym keledi. Bul týraly ashyq aıtýdy mańyzdy dep sanaımyn. Densaýlyq saqtaý mınıstri bolǵanym úshin emes, árqaısymyzdyń bir kúni ózimiz nemese jaqyn adamymyz úshin osyndaı sheshim qabyldaý qajettiligine tap bolýymyz múmkin bolǵandyqtan. Qaıtys bolǵannan keıingi donorlyq — ómir súrýge múmkindigi bar adamdarǵa ómirden ótkennen keıin de kómektesýdiń bir joly, — dep jazdy ol Instagram-daǵy paraqshasynda.
Onyń sózinshe, búginde Qazaqstanda shamamen 184 myń adam óz erkin bildirýin eGov arqyly tirkep qoıǵan. Kelisim bildirýshiler sany artyp keledi. Alaıda kútý paraǵyndaǵy árbir sannyń artynda ómirin saqtap qalýǵa degen úmit bar.
Búginde 4 867 otandasymyz transplantattaýdy kútýde:
- 4 311 adamǵa — búırekti;
- 212 adam — júrekti;
- 314 adam — baýyrdy;
- 30 adam — ókpeni transplantattaý qajet.
— Biz qaıtys bolǵannan keıingi donorlyqty damytý — densaýlyq saqtaý júıesiniń ǵana mindeti emes ekenin únemi aıtyp kelemiz. Bul — qoǵamnyń senimi, ashyq qoǵamdyq dıalog jáne ár adamnyń sanaly túrde qabyldaǵan sheshimi, — dep túıindedi mınıstr.
Osyǵan deıin Aıda Balaeva aǵza donorlyǵyna kelisim beretinin aıtty.
