Densaýlyq saqtaý men bilimge bólingen qarajatty jymqyrǵandardy jazaǵa tartý kerek - Toqaev
ASTANA. KAZINFORM — Úkimet 1 jeltoqsanǵa deıin Biryńǵaı memlekettik medıtsınalyq aqparattyq júıe qurý jumysyn aıaqtaýy qajet. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
- Densaýlyq saqtaý salasynda jeke-jeke jumys isteıtin 30-dan astam aqparattyq júıe bar. Atalǵan júıelerdi bir-birine tolyqqandy baılanystyrýdy buǵan deıin qansha talap etsek te, sol kúıi jasalmady. Bıýdjet qarjysyn jymqyrýdyń basty sebepteriniń biri – osy. Salalyq mınıstrlerdiń kóz aldynda buryn-sońdy bolmaǵan aýqymdaǵy alaıaqtyq ister jasalǵany tańǵaldyrady. Onyń ústine bul áleýmettik salada oryn alyp jatyr. Bas prokýratýra men basqa da ókiletti organdar qylmystyń qashan jasalǵanyna, ony kimderdiń jasyrǵanyna qaramastan, isti egjeı-tegjeıli tekserip, aqıqatty anyqtaýǵa mindetti. Tergeý protsesin óz baqylaýymda ustaımyn, - dedi Prezıdent.
Osy oraıda Memleket basshysy Úkimetke 1 jeltoqsanǵa deıin Biryńǵaı memlekettik medıtsınalyq aqparattyq júıe qurý jumysyn aıaqtaýdy tapsyrdy.
- Bul barlyq úderiske baqylaý jasap, basynan aıaǵyna deıin qadaǵalap otyratyn júıe bolýǵa tıis. Mindetti áleýmettik medıtsınalyq saqtandyrý júıesiniń de barynsha ashyq bolýyn qamtamasyz etý kerek. Áleýmettik medıtsınalyq saqtandyrý qorynda jalǵan qujat toltyryp, derekterdi burmalaıtyn qıturqy joldar bar ekeni anyqtaldy, - dedi Qasym-Jomart Toqaev.
Prezıdent Ulttyq quryltaıdyń otyrysynda osy máselege arnaıy toqtalǵanyn eske saldy.
- Taǵy da aıtamyn. Bas prokýratýra jáne tıisti quqyq qorǵaý mekemeleri barlyq jymqyrý áreketterine qatysy bar adamdardy zań turǵysynan jaýapqa tartýy qajet. Bilim salasynda da neshe túrli alaıaqtyq áreketter bar bolyp shyqty. Zańdy buzǵan azamattardy mindetti túrde jazaǵa tartý kerek. Úkimetke jyl sońyna deıin Qordyń jumysyn tolyq tsıfrlandyrýdy tapsyramyn. Sonda ǵana jumys ashyq júrgiziledi, al qarjy tıimdi jumsalady, - dedi Memleket basshysy.
Buǵan deıin Prezıdent salyq júıesin jappaı tsıfrlandyrýǵa shuǵyl kirisken jón ekenin aıtqan edi.