Densaýlyq saqtaý mekemeleri JCI standartyna saı bolýǵa umtylýy kerek – Premer-Mınıstr
ASTANA. KAZINFORM – Elimizde tek 9 medıtsınalyq uıym ǵana JCI halyqaralyq standartyna sáıkes keledi. Bul týraly búgin Úkimet otyrysynda Premer-Mınıstr Oljas Bektenov aıtty.
«Densaýlyq saqtaý mınıstrligi ákimdiktermen birlesip tujyrymdama is-sharalaryn iske asyrýǵa kirisýi qajet. Densaýlyq saqtaý nysandaryn josparlaý, jobalaý, salý jáne olarǵa qyzmet kórsetý kezinde halyqaralyq normalarǵa sáıkes biryńǵaı keshendi tásildi qamtamasyz etý kerek», - dedi Úkimet basshysy.
Bul rette Premer-Mınıstr demografııalyq kórsetkishter, syrqattanýshylyq deńgeıi men ereksheligi eskerilýi tıistigin, belgilengen barlyq standart naqty saqtalýy qajettigin basa aıtty.
«Meniń bilýimshe, JCI (Joint Commission International) halyqaralyq standartyna Qazaqstanda tek 9 medıtsına uıymy sáıkes keledi. Olardyń qatarynda Ulttyq ǵylymı kardıohırýrgııa ortalyǵy, Ana men bala ulttyq ortalyǵy jáne basqalary bar. Osy standarttar boıynsha akkredıttelý densaýlyq saqtaý sapasynyń «joǵary deńgeıin» kórsetedi. Barlyq densaýlyq saqtaý mekemeleri osyndaı deńgeıge umtylýy kerek. Sondyqtan negizgi nysnadardy jobalaý kezeńinen bastap JCI halyqaralyq standartynyń talaptary eskerilip kózdelýi tıis», - dedi ol.
Oljas Bektenov densaýlyq saqtaýdyń jańa jáne rekonstrýktsııalanatyn barlyq jobasyna turaqty monıtorıng jasaýdy jolǵa qoıyp, onyń ishinde tsıfrlandyrý arqyly iske asyrý kerektigin atap ótti.
«Infraqurylymdy ádisnamalyq súıemeldeý jónindegi mindet «Turar Healthcare» ulttyq operatoryna júkteledi. Buǵan deıin Aýyldyq densaýlyq saqtaý ulttyq jobasyn úılestirý men monıtorıngteý júktelgen bolatyn. Sondyqtan mınıstrlikke jergilikti jerlerde qurylys barysyn baqylaý úshin resýrstyq áleýetti qamtamasyz ete otyra, operatordyń rólin kúsheıtýdi tapsyramyn», - dedi Premer-Mınıstr.
