Densaýlyq saqtaý eks-mınıstri Talapqalı Іzmuhambetov qaıtys boldy
ASTANA. KAZINFORM - Búgin elimizdiń burynǵy Densaýlyq saqtaý mınıstri, medıtsına ǵylymdarynyń kandıdaty, Qazaqstan Respýblıkasynyń Eńbek sińirgen qyzmetkeri, KSRO densaýlyq saqtaý úzdigi, medıtsına qyzmetkerleriniń kóptegen urpaqtarynyń tálimgeri Talapqalı Ábishuly Іzmuhambetov qaıtys boldy.
QR Densaýlyq saqtaý mınıstrligi baspasóz qyzmetiniń habarlaýynsha, Talapqalı Ábishuly kásibı qyzmetin hırýrg dárigerden bastady, sodan keıin aýdandyq ortalyq aýrýhananyń bas dárigeri, Shyǵys Qazaqstan jáne Almaty oblystyq densaýlyq saqtaý bólimderi meńgerýshisiniń orynbasary jáne meńgerýshisi bolyp jumys istedi. 1987-1990 jyldary Qazaq KSR Densaýlyq saqtaý mınıstri qyzmetin atqardy.
Medıtsınalyq qoǵamdastyqtyń, kóptegen stýdentterdiń, áriptesterdiń esinde ol jarqyn erekshe tulǵa, óz isiniń úlken entýzıasty bolyp qala beredi, ol ultty saýyqtyrý boıynsha birqatar iri bastamalardyń avtory boldy.
Densaýlyq saqtaý mınıstrligi áıgili dárigerdiń barlyq jaqyndary men týystaryna qaıǵylaryna ortaqtasyp kóńil aıtady. Talapqalı Ábishulynyń baǵa jetpes eńbekteri, aýqymdy ıdeıalary qazaqstandyqtardyń kóptegen urpaqtarynyń densaýlyǵy úshin qyzmet etetin bolady.
