Densaýlyq mınıstrligi: Ekpe almaǵandar balabaqshaǵa kirgizilmeıtini – feık

Sanıtarııalyq-epıdemıologııalyq baqylaý komıtetiniń tóraǵasy Nurqan Oljabaev Densaýlyq saqtaý mınıstrligi ekpe almaǵandardy balabaqshaǵa kirgizbeý týraly qaýly shyǵarmaǵanyn málim etti, dep habarlaıdy Kazinform.

Úkimet otyrysynan keıin jýrnalıst komıtet basshysynan ekpe almaǵandardyń balabaqshaǵa kirgizilmeıtini týraly aqparattyń shyn-ótirigin surady.

«Ondaı shekteý engizý úshin Bas sanıtar dárigerdiń qaýlysy shyǵýy kerek. Ondaı qaýly shyqqan joq. Qazir qoldanyp júrgen buıryǵymyzda balabaqsha toptaryndaǵy ekpe almaǵan balalardyń úlesi 10 paıyzdan aspaýy kerektigi aıtylǵan. Odan basqa buıryq joq. Al ol buıryq 2020 jylǵy Halyq densaýlyǵy týraly kodeks aıasynda qabyldanǵan. Sol kezden beri eshqandaı ózgeris bolǵan joq», – dedi ol.

Sondaı-aq komıtet tóraǵasy osy mánde tarap jatqan aqparattardyń feık ekendigin naqtylap ótti.

Aıta keteıik, búgin Úkimet otyrysynda A.Ǵınııat tek qarasha aıynda 6 myńnan astam qazaqstandyq qyzylsha juqtyrǵanyn málim etti. Onyń ishinde 30 bala jansaqtaý bóliminde jatyr. Sondaı-aq mınıstr atalǵan indetten vaktsına almaýdyń saldaryn atady.

Premer-Mınıstr Álıhan Smaıylov mundaı qaýipti vırýspen vaktsınalaýdan ózge jolmen kúresý múmkin emes ekendigin atap ótti.