Denıs Tenniń stsenarııimen túsirilgen fılm jaryq kórdi
Qaıǵyly oqıǵadan bir aı buryn, 2018 jyldyń maýsymynda Denıs Ten fılm stsenarııin Screenlife Contest baıqaýyna joldaǵan jáne fınalıster qatarynan kóringen.
Túsirilim jumystary s portshy óliminen keıin 2019 jyly bastalǵan. Oǵan Venetsııa kınofestıvaliniń jeńimpazy Chak Che rejısserlik etse, tanymal rejısser Tımýr Bekmambetov pen Denıstiń anasy Oksana Ten bas prodıýser boldy.
Elordadaǵy tusaýkeserge Denıs Tenniń anasy, dostary, tanymal akterler jáne QR Mádenıet jáne sport mınıstrliginiń ókilderi keldi.
Sonymen birge, Nur-Sultandaǵy zaǵıptar qaýymdastyǵy úshin arnaıy kınozal ázirlendi, onda fılmniń aýdıodıskrıptsııasy qatar júrgizildi. Óıtkeni, fılm jelisi zaǵıp jigit pen kereń jáne mylqaý boıjetken arasynda órbıdi. Jańa tehnologııalar múmkindigi shekteýli jandardyń bir-birin túsinisýine kómektesedi.
Fılmniń jalpy uzaqtyǵy – 33 mınýt, túsirilim toby Denıstiń bastapqy stsenarııin barynsha ózgerissiz qaldyrýǵa tyrysqan. Bul týyndynyń qalaı túsirilgeni týraly Qanat Beısekeevtiń «Fılm týraly fılmi» qosa kórsetiledi. Derekti fılmde Denıstiń aǵylshyn tilinde jazǵan óleń shýmaqtary, ánderi kınokartınada kórsetiletini aıtylǵan.
«Biz suhbat qurý úshin tsıfrlyq habarlamalar, emodzıler jáne basqalaryn paıdalanatyn álemde ómir súrip jatyrmyz. Bul ıdeıa ózime de qyzyq boldy. Men qatty qobaljyp júrmin, óıtkeni bul jaı ǵana qysqametrajdy fılm emes. Bul Denısten qalǵan amanat, biz jaqsy kóretin jáne qurmetteıtin adamnyń bastamasy. Bul bastamany buzǵymyz kelmeıdi nemese bostan-bos ótkizip alǵymyz kelmeıdi. Munda men minsiz fılm jasaǵym keledi, onyń ózi, aınalasyndaǵy jaqyndary kútkennen de jaqsy týyndy usynǵym keldi. Fılmde Denıstiń jankúıerlerine unaıtyn keremet sátter bar, kóptegen tosynsyılar jasyrylǵan. Tipti Denıs týraly estimegen sheteldikter de osy fılm arqyly aıtqymyz kelgen qundylyqtardy túsiner edi», - dedi fılm rejısseri Chak Che.
Sonymen birge, sportshynyń jaqyn dosy Igor Tsaı fılmniń atqarýshy prodıýseri boldy.
«Biz Los-Andjeleste kezdestik, men jańa kıno jobasymen jumys istep júrdim, al Denıs jattyǵýǵa keletin. Sonda Denıske stsenarıı jazyp, Screenlife Contest baıqaýyna qatysýdy usynǵan edim. Muny umytyp ta ketippin, úsh aıdan keıin Denıstiń stsenarııi fınalǵa ótkenin jáne Máskeýde óz ıdeıasyn qorǵaıtynyn estidim. Men onyń áńgime, án jazatynyn biletinmin, stsenarıı de jaza alatynyna senimdi boldym. Óıtkeni, ol muz aıdynynda óz tánimen, bıimen hıkaıa baıandaıtyn storıteller edi», - dedi I. Tsaı.
Tanymal aktrısa Álııa Telebarısova da tusaýkeserge keldi jáne Denıstiń qandaı jarqyn jáne shynaıy adam bolǵanyn aıtyp berdi.
«Barlyǵy Denısti sheksiz jaqsy kóretin, óıtkeni onyń jan jylýy, kúsh-jigeri mol edi. Bul fılmde Denıs adamdarǵa mahabbattyń ne ekenin aıtyp úlgerdi dep oılaımyn. Adamnyń táninde kinárat bolsa da, mahabbattyń esh shekarasy joq, ol bárine birdeı. Meniń bilýimshe, búgin fılmge Zaǵıptar qoǵamynyń músheleri keldi, olarǵa ekrannan tys qosymsha túsindirme jasalady. Kórermender osy fılmde Denıs aıtqysy kelgen oıdy tolyqtaı sezine alady dep oılaımyn. Biz Denısti árdaıym este saqtaımyz jáne súıemiz, baǵalaımyz. Ol bárimiz úshin naǵyz batyr. Ol eshqashan umytylmaıdy jáne bul fılm oǵan dálel», - deıdi aktrısa.
Fılm aıaqtalǵannan keıin Denıs Tenniń dosy jáne prodıýser Igor Tsaı sportshy atyndaǵy qordyń áli de talaı jobany júzege asyratynyn aıtty.
«Mını Denıs» atty joba bar. Bul Denıs Ten jasaǵan anımatsııalyq keıipker, onyń Instagram -da óz paraqshasy bar.
Qazir bul jobany jandandyryp, anımatsııalyq serııa nemese fılm nemese mýzykalyq klıp jasaý týraly oılap otyrmyz. Jartylaı ázirlengen ekinshi jobamyz – mýzykalyq albom. Denıs kóp ýaqyt mýzykamen aınalysyp, án aıtqan. Sondyqtan ázirge eki sıngly albomdy barlyq mýzykalyq platformalarda tyńdaı alasyzdar. Jaqynda osy fılmdegi barlyq trekter de qoljetimdi bolady», - dedi prodıýser.
