Denıs Tenniń ólimine qatysty is sotqa tústi

ALMATY. QazAqparat -Denıs Tenniń ólimine qatysty is sotqa jiberildi. Qylmystyq is Almaty qalalyq qylmystyq ister boıynsha mamandandyrylǵan aýdanaralyq sotynda qaralatyn boldy, dep habarlaıdy QazAqparat tilshisi qalalyq sottyń baspasóz qyzmetine silteme jasap.

«Mamandandyrylǵan qylmystyq sotqa QR QK 434-baby, QR QK 24-babynyń 3-bólimi, 188-babynyń 2-bóliminiń 1- tarmaǵy boıynsha aıyptalǵan  J.Tolybaeva, al QR QK 188-babynyń 2-bóliminiń 1 tarmaǵy, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan A. Qudaıbergenov, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Nuraly Qııasovqa qatysty is 13 jeltoqsanda tústi. Qylmystyq is 38 tomnan turady. Іs boıynsha 3 sottalýshy sot aldynda jaýap beredi», - dedi baspasóz qyzmetinen.

Eske salsaq, qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan kóz jumǵan edi. Oqıǵa Qurmanǵazy men Baıseıitova kósheleriniń qıylysynda 19 shildede túski saǵat 15:00-der shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusynan jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi.

Biraq Almaty qalalyq densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn. 2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.

Adam óltirý babymen qylmystyq is qozǵaldy. Keıin belgili bolǵandaı, sportshynyń ólimine qatysy bar kúdiktiler ustalyp, qylmystaryn moıyndady.