Denıs Tenniń muz ústindegi shoýy jalǵasyn tappaq
ASTANA. QazAqparat - Denıs Tenniń qoǵamdyq qory sportshy ózi ótkizgen muz ústindegi shoýyn dástúr boıynsha jalǵastyrmaq, dep habarlaıdy QazAqparat tilshisi.
«Bizdiń naqty josparymyz bar. Jyl saıyn muz ústindegi shoýdy ótkizetin bolamyz. Bul Denıstiń ózi bastap ketken joba. Jankúıerlerine qatty unaıtyn. Oksana Alekseevna ( Denıs Tenniń anasy), Denıstiń dostary - bári de jyl saıyn kelip, shoýdy ótkizýge nıet bildirdi. Endigi kezekte sharany qalaı ótkizýdi josparlap otyrmyz. Mindetti túrde qaıta qolǵa alamyz», - dedi «Ortalyq Azııa janarmaı-energetıkalyq kompanııasy» AQ prezıdenti Sergeı Kan Astanada ótken baspasóz máslıhatynda.
Eske sala ketsek, «Denıs Ten jáne onyń dostary» muz ústindegi shoýy Astana men Almaty qalalarynda birneshe ret ótkkizilgen bolatyn. Sońǵy ret Denıs Ten men onyń dostary Astanada 9 maýsymda «Barys Arenada» elordalyqtarǵa keremet shoý tartý etken bolatyn.
Eske sala ketsek, elordada búgin ótken Denıs Ten qorynyń baspasóz máslıhatynda sportshynyń anasy Oksana Ten sportshy atyndaǵy mánerlep syrǵanaý akademııasyn 2019 jyly ashý josparlanyp otyrǵanyn habarlaǵan edi.
Óz kezeginde rejısser ári prodıýser Tımýr Bekmambetov Denıs Tenniń ózi stsenarııin jazyp ketken «Kózsiz mahabbat» fılminiń túsiriliminiń qalaı júrgizilgeli jatqanyn aıtyp bergen bolatyn.
